Սոթքի ոսկու հանքից գողության փորձի ժամանակ հանցագործը ատրճանակով սպառնացել է հանքի աշխատակցին
ԵՐԵՎԱՆ, 10 մարտ. /Նովոստի-Արմենիա/. ՀՀ քննչական կոմիտեի Գեղարքունիքի մարզային քննչական վարչության Վարդենիսի քննչական բաժնում քննություն է տարվում՝ պարզելու Սոթքի ոսկու հանքից գողության փորձ կատարելու հանգամանքները, հաղորդում է ՀՀ ՔԿ մամուլի ծառայությունը:
Հաղորդագրության համաձայն, 2017 թվականի մարտի 7-ին «ԳեոՊրոՄայնինգ Գոլդ» ՍՊ ընկերությունից հաղորդում է ստացվել առ այն, որ նույն օրը` ժամը 16:30-ի սահմանում, Սոթքի ոսկու հանքի «բաց հանք» կոչվող հատվածում գտնվող հանքախորշերից մեկում նկատվել են երկու անձինք, և երբ էքսկավատորը մոտեցել է նշված հանքախորշին` այն փակելու, հիշյալ անձանցից մեկը ատրճանակ է պահել էքսկավատորի օպերատորի ուղղությամբ, որից դրդված՝ էքսկավատորի օպերատորը դադարեցրել է իր աշխատանքը, իսկ նրանք թաքնվել են հանքախորշում:
Դեպքի առթիվ մարզի դատախազությունում 2017թ. մարտի 9-ին հարուցվել է քրեական գործ՝ ՀՀ քրեական օրենսգրքի 34-177-րդ հոդվածի 2-րդ մասի 1-ին կետով (Գողության փորձ, որը կատարվել է մի խումբ անձանց կողմից նախնական համաձայնությամբ) և 235-րդ հոդվածի 1-ին մասի հատկանիշներով, որը մարտի 10-ին (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) ստացվել է ՀՀ ՔԿ Գեղարքունիքի մարզային քննչական վարչության Վարդենիսի քննչական բաժնում:
Քրեական գործն ընդունվել է վարույթ, և իրականացվում են անհրաժեշտ քննչական գործողություններ՝ դեպքի հանգամանքները պարզելու ուղղությամբ: Մշակվել է քննչական պլան, առաջ քաշվել աշխատանքային վարկածներ, որոնք ստուգելու համար կատարվում են անհրաժեշտ քննչական և օպերատիվ-հետախուզական միջոցառումներ։
Հանձնարարություն է տրվել ոստիկանության համապատասխան ստորաբաժանումներին միջոցներ ձեռնարկել՝ առերևույթ հանցագործություն կատարած անձանց ինքնությունը պարզելու և վարույթն իրականացնող մարմնին ներկայացնելու ուղղությամբ։ -0-
