ՃՏՊ Ռուսաստանի Ստավրոպոլի երկրամասում. տուժել են ՀՀ քաղաքացիներ
ԵՐԵՎԱՆ, 17 հունիսի. /ԱՌԿԱ/. Ռուսաստանում Հայաստանի դեսպանատունը տեղեկություն է հայտնել ՌԴ Ստավրոպոլի երկրամասում տեղի ունեցած վթարում տուժած ՀՀ քաղաքացիների առողջական վիճակի մասին:
«Հայտնում ենք, որ ՌԴ Ստավրոպոլի երկրամասում` «Կովկաս» դաշնային ավտոմայրուղու 250-րդ կիլոմետրին, ՀՀ պետհամարանիշերով մինիվենի մասնակցությամբ վթարի հետևանքով հոսպիտալացվել է ՀՀ չորս քաղաքացի», - հայտնում է ՀՀ դեսպանատունը։
Դեսպանության կողմից ճշտված տվյալներով, տուժած քաղաքացիները տեղափոխվել են Նեվիննոմիսկի քաղաքային հիվանդանոց։ Քաղաքացիներից մեկն անհրաժեշտ բուժօգնություն ստանալուց հետո դուրս է գրվել հիվանդանոցից։
Նշվում է, որ ներկայում երեք քաղաքացի շարունակում է գտնվել բուժհաստատությունում։ Դեսպանությունը մշտական կապի մեջ է ՌԴ համապատասխան մարմինների և բուժհաստատության ղեկավարության հետ։
Ինչպես հայտնում են հայկական ԶԼՄ-ները, բախվել են Hyundai մաքնիշի ավտոմեքենան և Պյատիգորսկ ուղևորվող միքրոավտոբուսը: Hyundai մեքենայի վարորդը և ուղևորը տեղում մահացել են: Ընդհանուր առմամբ, տուժել է 10 մարդ, ովքեր հոսպիտալացվել են Նեվիննոմիսկի քաղաքային հիվանդանոց:-0-
