Նախագահի վերահսկողության ծառայության նախկին պետի մեքենայում հայտնաբերվել է զենք-զինամթերք (ՎԻԴԵՈ)
ԵՐԵՎԱՆ, 19 հունիսի. /ԱՌԿԱ/. ՀՀ ոստիկանության կազմակերպված հանցավորության դեմ պայքարի գլխավոր վարչությունում տեղեկություններ են ստացվել, որ նախկին բարձրաստիճան պաշտոնյա Հովհաննես Հովսեփյանի ու նրա թիկնապահի մեքենաներում զենք-զինամթերք կա։
Ինչպես հայտնում է ՀՀ ոստիկանության մամուլի ծառայությունը, հունիսի 18-ի գիշերը՝ ժամը 23-ն անց 40-ի սահմաններում, ոստիկանները Կիևյան և Օրբելի փողոցների խաչմերուկում հատուկ գործողություն են իրականացրել։ Մեքենաներում հայտնաբերվել են ինքնաձիգ և ատրճանակ, որոնց օրինականությունը ստուգվում է։
«Մեքենաները տեղափոխել են ճանապարհային ոստիկանության պահպանվող հատուկ տարածք։ Դրանցից երկուսը եղել են փոխարինված համարանիշերով, ինչպես և մեքենաներում տեղադրված են եղել հատուկ ձայնային ազդանշաններ արձակելու սարքավորումներ, առկայծող փարոսիկներ, նաև ռադիոկապի միջոցներ։ Իրավախախտումների փաստերով կազմվել են արձանագրություններ։ Հանգամանքները պարզվում են», – նշվում է տարածած հաղորդագրությունում։
Հովհաննես Հովսեփյանը նախկինում զբաղեցրել է մի շարք բարձր պաշտոններ։ Մասնավորապես, ղեկավարել է նախագահի վերահսկողության ծառայությունը ու ՀՀ պետեկամուտների կոմիտեն։–0–
