Վթարի է ենթարկվել Ստամբուլ–Երևան ուղևորվող ավտոբուսը

ԵՐԵՎԱՆ, 23 դեկտեմբերի. /ԱՌԿԱ/. Ստամբուլից Երևան ՀՀ քաղաքացիներ տեղափոխող ավտոբուսը վթարի է ենթարկվել դեկտեմբերի 23-ին առավոտյան ժամը 03:20-ին։

Ինչպես հաղորդում է «Նովոստի–Արմենիա»գործակալությունը, հղում անելով ՀՀ ԱԳՆ–ի մամուլի ծառայությանը, Ստամբուլից Երևան ՀՀ քաղաքացիներ տեղափոխող «Ռիչ Տուր» ընկերության ավտոբուսը վթարի է ենթարկվել զուգահեռ ընթացող ավտոմեքենայի անզգույշ մանևրի պատճառով:

Դեպքը տեղի է ունեցել Ստամբուլից արևելք՝ Բոլու քաղաքի մոտակայքում:

Բաթումում ՀՀ գլխավոր հյուպատոսությունից ստացված տեղեկատվության համաձայն` վթարի հետևանքով զոհեր չկան, երեք հոգի ստացել են թեթև մարմնական վնասվածքներ:

«Ուղևորներն անվտանգ տեղափոխվել են Ստամբուլ», – նշվում է հաղորդագրության մեջ։

Ըստ «Ռիչ Տուր» ընկերության ներկայացուցիչ Նարեկ Մամուլյանի՝ մինչև այսօր երեկո ավտոբուսը կվերականգնվի, և բոլոր ուղևորները կտեղափոխվեն Հայաստան:–0–