«Երևան Սիթիի» սննդի կետում խոշոր հրդեհ է բռնկվել, երկու քաղաքացի ծխահարվել է (ՎԻԴԵՈ)

ԵՐԵՎԱՆ, 6 նոյեմբերի․/ԱՌԿԱ/․ Այսօր խոշոր հրդեհ է բռնկվել Երևանի Կոմիտասի պողոտայում գտնվող «Երևան Սիթիի» տարածքում։

Ինչպես հայտնում է Փրկարար ծառայությունը, ժամը 11։08-ին Ճգնաժամային կառավարման ազգային կենտրոն ահազանգ է ստացվել, որ Երևան քաղաքի Կոմիտասի պողոտայի սննդի կետերից մեկում հրդեհ է բռնկվել։

Հրդեհի բարդության «1 ԲԻՍ» կանչով դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից չորս մարտական հաշվարկ և մեկ ավտոսանդուղք։ Հայտարարվել է հրդեհի բարդության «Թիվ 3 կանչ»․ դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից ևս տասը մարտական հաշվարկ, մեկ ավտոսանդուղք, ԵՓՎ, ՓՈՒՎ հրդեհաշիջման և փրկարարական աշխատանքների կազմակերպման բաժինների, Հոգեբանական աջակցության և Բժշկական ապահովման վարչության հերթապահ, Ճգնաժամային կառավարման ազգային կենտրոնի օպերատիվ և Փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական խմբերը և գազածխապաշտպան ծառայության ավտոմեքենան։

Հրդեհը մեկուսացվել է ժամը 13։09-ին։

Դեպքի վայրում աշխատանքները ղեկավարում է ՆԳՆ փրկարար ծառայության տնօրեն-ՆԳ նախարարի տեղակալ, փ/ծ գեներալ-մայոր, Կամո Ցուցուլյանը։

ՆԳ նախարարի մամուլի քարտուղար Նարեկ Սարգսյանը լրագրողների հայտնել է, որ երկու քաղաքացի ծխահարության հետևանքով ստացել է առաջին բուժօգնություն։