«Գրանդ Քենդի» ՓԲԸ–ի տարածքում բռնկած հրդեհը վերջնականապես մարվել է. ԱԻՆ

ԵՐԵՎԱՆ, 25 սեպտեմբերի. /ԱՌԿԱ/. «Գրանդ Քենդի» ՓԲԸ–ի տարածքում բռնկած հրդեհը վերջնականապես մարվել է, հաղորդում է ՀՀ ԱԻՆ մամուլի ծառայությունը։

Մասիսի 31 հասցեում գտնվող ֆաբրիկայում հրդեհի բռնկման մասին ահազանգը ստացվել է չորեքշաբթի առավոտյանը ժամը 7–ի սահմաններում։ Հրդեհը բռնկվել է ստվարաթղթի արտադրամասում։ Այրվել է շուրջ 1800 քառակուսի մետր տարածք։

«Հրդեհը մեկուսացվել է տեղական ժամանակով ժամը 11.10–ին, մարվել` 12.13–ին», – նշվում է հաղորդագրության մեջ։

Հրդեհի մարման աշխատանքներին մասնակցում էր 12 մարտական հաշվարկ և 2 ավտոսանդուղք, օգտագործվել է նաև Երևանի քաղաքապետարանի և ՀՀ բնապահպանության նախարարության համապատասխան տեխնիկան։

«Գրանդ քենդի» ընկերությունը ստեղծվել է 2000թ.-ին, կարճ ժամանակում դարձել է Հայաստանի առաջատար հրուշակեղենի գործարանը` արտադրելով ավելի քան 350 անում արտադրանք։ Ընկերությունը Կովկասի միակ ձեռնարկությունն է, որը զբաղվում է կակաոյի վերամշակմամբ։--0—