Մերձավանում կրակոցների հետևանքով վիրավորում ստացած անձի կյանքին վտանգ չի սպառնում. ՆԳՆ ՄԱՆՐԱՄԱՍՆԵՐ
ԵՐԵՎԱՆ, 24 սեպտեմբեր․/ԱՌԿԱ/. Հայտնի է Մերձավանի կրակոցների հետևանքով վիրավորում ստացած անձի ինքնությունը: Վերջինս Արծրուն Գալստյանն է: Նա տեղափոխվել է ԲԿ: Վիրահատվել է, այս պահին մեզ հասած տեղեկություններով կյանքին վտանգ չի սպառնում: Այս մասին ասել է ՆԳՆ նախարարի մամուլի քարտուղար Նարեկ Սարգսյանը։
«Ըստ նախնական տեղեկությունների՝ դիմակավորված, ձեռնոցներով մեկ անձ մոտեցել է կանգնած 3 անձանց, կրակահերթ է արձակել»,- ասաց Սարգսյանը:
Ինչպես հաղորդել էինք ավելի վաղ, սեպտեմբերի 23-ին՝ ժամը 23.52-ին Արմավիրի մարզի Մերձավան բնակավայրի Երևանյան խճուղում կրակոցներ են հնչել։ Նախնական տվյալներով կա 2 զոհ, 1 վիրավոր։ Մահացածներից մեկը համայնքի ղեկավար Վալոդյա Գրիգորյանն է։
Ինչպես լրագրողների դեպքի վայրում հայտնել է Սարգսյանը, մահացածներից մյուսը ՆԳՆ ոստիկանության Արարատի քրեական ոստիկանության քրեական ոստիկան Կարեն Աբրահամյանն է, ով ծառայության մեջ չի եղել։ «Նա ընկերական հարաբերությունների մեջ է եղել Վալոդյա Գրիգորյանի հետ, այդ պահին ուղղակի միասին են եղել», – նշել է Սարգսյանը։
Գրիգորյանը Փարաքար համայնքի ղեկավար է ընտրվել ընդդիմադիր «Միասնություն» դաշինքից 2025 թ.-ի մարտի 30-ին կայացած արտահերթ ՏԻՄ ընտրություններում։
Նա ստացել էր քվեների կեսից ավելին՝ 57 տոկոսը։ Ընտրված համայնքապետը լիազորությունները ստանձննել էր ապրիլի 19-ից։
