Քրեական գործ հավանաբար կհարուցվի Երևանի կենտրոնում շենքի փլուզման փաստով. Հայաստանի ԱԻՆ

ԵՐԵՎԱՆ, 25 հոկտեմբերի. /ԱՌԿԱ/. Քրեական գործ հավանաբար կհարուցվի Երևանի կենտրոնում շենքի փլուզման փաստով, հինգշաբթի լրագրողներին ասաց Հայաստանի Փրկարար ծառայության պետի տեղակալ Նիկոլայ Գրիգորյանը, հաղորդում է «Նովոստի-Արմենիա» գործակալությունը:

«Իմ կարծիքով՝ տվյալ փաստով քրեական գործ կհարուցվի, որի շրջանակներում արդեն հնարավոր կլինի խոսել սխալների և պատճառահետևանքային կապերի մասին«»,- ասաց նա:

Հոկտեմբերի 25-ին, ժամը 13.10-ին ահազանգ է ստացվել, որ Երևանի Խանջյան փողոցի թիվ 20 շենքի մոտակայքում տեղի է ունեցել կիսակառույց շենքի փլուզում: Նախնական տվյալներով՝ 11 տուժած տեղափոխվել է «Գրիգոր Լուսավորիչ» բժշկական կենտրոն, նրանցից հինգի վիճակը, ըստ առողջապահության նախարարության տվյալների, ծանր է, իսկ չորսինը՝ միջին ծանրության։

Գրիգորյանը հայտնեց նաև, որ փլուզված շենքը պատկանում է դրա հարևանությամբ գտնվող «Jose» ժամանցային կենտրոնի սեփականատիրոջը` միաժամանակ զերծ մնալով հավելյալ տեղեկության տրամադրումից։

Երևանի փրկարար վարչության պետ, գնդապետ Մուշեղ Ղազարյանն իր հերթին նշեց, որ բոլոր տասնմեկ տուժածները շինբրիգադի անդամներ են։

Այս պահին փրկարարները քննարկում են փլատակների հավաքման առավել ճիշտ ձևեր, ինչը կապված է որոշակի դժվարությունների հետ, քանի որ որոշ տեղերում բետոնը դեռ չի չորացել։

Կիսակառույց շենքի փլուզման վայր է ժամանել Հայաստանի արտակարգ իրավիճակների նախարար Արմեն Երիցյանը։ -0-