Թմրամիջոցներ՝ ներքնակներում. ՊԵԿ-ը կանխել է Իսպանիայից Հայաստան ավելի քան 420 գրամ կոկաինի ներմուծումը (ՎԻԴԵՈ)
ԵՐԵՎԱՆ, 3 նոյեմբեր․/ԱՌԿԱ/. ՊԵԿ-ի մաքսանենգության դեմ պայքարի վարչությունը կոկաինի մաքսանենգության փորձի գործով ձերբակալել է չորս անձի։ Թմրամիջոցները «Հայփոստ»-ի միջոցով Իսպանիայից են ներմուծվել, որոնք թաքցված են եղել կենդանիների ներքնակների մեջ։ Այս մասին հայտնում է ՊԵԿ-ի մամուլի ծառայությունը։
ՊԵԿ-ի և Էլեկտրոնային առևտրի վարչության աշխատակիցները մաքսային զննման են ենթարկել Իսպանիայից Հայաստան ներմուծված երկու առաքանի։ Կենդանիների համար նախատեսված ներքնակներից հայտնաբերվել են 178 և 250 գրամ կոկաին։
Նախնական ուսումնասիրությունները ցույց են տվել, որ առաքանիների հասցեատերերը բնակվում են տարբեր քաղաքներում և առաջին հայացքից իրար հետ որևէ առնչություն չեն ունեցել։ Սակայն հայտնաբերված զանգվածների նմանությունը կասկած է հարուցել վարչության աշխատակիցների մոտ։
Վարչության օպերատիվ հետախուզության բաժնի աշխատակիցները, համագործակցելով «Հայփոստ»-ի անվտանգության աշխատակիցների հետ համատեղ իրականացված օպերատիվ միջոցառումների արդյունքում Երևանում ձերբակալել են ՀՀ երկու քաղաքացիների՝ Ա․Ս․-ին և Ա․Ե․-ին։ Նրանցից մեկի մոտ անձնական խուզարկության ժամանակ հայտնաբերվել է լիցքավորված ատրճանակ։
Ձերբակալված անձինք ներկայացվել են Քննչական կոմիտեի տնտեսական հանցագործությունների և մաքսանենգությունների քննության գլխավոր վարչություն։
Օպերատիվ գործողությունները շարունակվել են նաև Դիլիջանում, որտեղ ձերբակալվել են ևս երկու ՀՀ քաղաքացիներ։
Քննչական կոմիտեի տվյալներով՝ թմրամիջոցների ներմուծումն ու ստացումը կազմակերպել է ձերբակալված Ա․Ե․-ն։
Նախաձեռնվել է քրեական վարույթ՝ ՀՀ քրեական օրենսգրքի 393-րդ (Թմրամիջոցների, հոգեմետ (հոգեներգործուն) նյութերի ապօրինի շրջանառությունն իրացնելու նպատակով կամ դրանք ապօրինի իրացնելը) և 399-րդ (Թմրամիջոցների, հոգեմետ (հոգեներգործուն) նյութերի, դրանց պատրաստուկների, դրանց համարժեք նյութերի (անալոգի) կամ դրանց ածանցյալների կամ դրանց պրեկուրսորների մաքսանենգությունը) հոդվածներով։
Դատարանը ձերբակալվածներից երեքի նկատմամբ որպես խափանման միջոց է ընտրել կալանավորումը, իսկ մեկ անձի նկատմամբ կիրառվել է վարչական հսկողություն։
