Երևանի կենտրոնում շենքի փլուզման հետևանքով տուժած տասը մարդ գտնվում է «Գրիգոր Լուսավորիչ» բժշկական կենտրոնում

ԵՐԵՎԱՆ, 25 հոկտեմբերի. /ԱՌԿԱ/. Երևանի կենտրոնում շենքի փլուզման հետևանքով տուժած տասը մարդ գտնվում է «Գրիգոր Լուսավորիչ» բժշկական կենտրոնում, ևս մեկին այս պահին տեղափոխում են հիվանդանոց, հաղորդում է բուժկենտրոնի փոխտնօրեն Գագիկ Մանուկյանը։

«Մենք ներկայում ռենտգենյան վերլուծություն ենք անցկացնում։ Աշխատում է բժշկական բրիգադ, մոբիլիզացվել է հիվանդանոցի ողջ բուժանձնակազմը»,– ասաց նա լրագրողներին։
 
Մանուկյանը հայտնեց, որ երկու տուժածներ արդեն համակարգչային զննում են անցել, նրանց մոտ հայտնաբերվել են վնասվածքներ և հեմատոմաներ։

Նա դժվարացավ գնահատել բոլոր տուժածների վիճակը՝ ասելով, որ կոնկրետ ախտորոշումները հայտնի կլինեն զննումից 2-3 ժամ անց։
«Իրավիճակը կհանդարտվի, և մենք կհայտնենք յուրաքանչյուր տուժածի ախտորոշումը»,– ասաց փոխտնօրենը։

Առողջապահության նախարարության տվյալներով՝ 11 տուժածներից հինգի վիճակը բժիշկները գնահատում են ծանր, չորսինը` միջին ծանրության։

Հոկտեմբերի 25-ին, ժամը 13.10-ին ահազանգ է ստացվել, որ Երևանի Խանջյան փողոցի թիվ 20 շենքի մոտակայքում տեղի է ունեցել կիսակառույց շենքի փլուզում: Դեպքի վայր են մեկնել ՃԿԿ ԱԻ արձագանքման, հատուկ փրկարարական ջոկատի հերթապահ խմբերը և վեց մարտական հաշվարկ:

ԱԻՆ նախարար Արմեն Երիցյանն անձամբ է զննում դեպքի վայրը։ Առողջապահության նախարարության ներկայացուցիչները գտնվում են դեպքի վայրում և «Գրիգոր Լուսավորիչ» բուժկենտրոնում։ -0-