2025 թ Հայաստանը նախատեսում է «նվաճել չնվաճված» միջազգային զբոսաշրջային շուկաները. Զբոսաշրջության կոմիտեի նախագահ
ԵՐԵՎԱՆ, 29 նոյեմբերի․/ԱՌԿԱ/․ Հայաստանի զբոսաշրջության կոմիտեի նախագահ Լուսինե Գևորգյանը «ԱՌԿԱ» գործակալությանը տված բացառիկ հարցազրույցում խոսել է 2025 թվականի ծրագրերի, միջազգային զբոսաշրջային շուկաներում Հայաստանի ներկայացուցչության, 2024 թվականին զբոսաշրջային այցելությունների ցուցանիշների և ներքին զբոսաշրջության զարգացման ծրագրերի մասին։
«ԱՌԿԱ». 2025 թվականին ինչ ծրագրեր են նախատեսվում իրականացնել Հայաստանի զբոսաշրջության ոլորտում միջազգային շուկաներում երկրի առաջխաղացման համար։
Լ. Գևորգյան. 2025 թվականին նախատեսվում է «նվաճել չնվաճված» միջազգային զբոսաշրջային շուկաները։ Մեկնարկային փուլում դա Չինաստանն է, որը մեզ համար առաջնահերթ ուղղություն է, և մենք ակնկալում ենք համագործակցություն այս երկրի խոշորագույն տուրիստական ընկերությունների հետ։ Ինչպես գիտեք, արդեն գործում է Երևան-Ուրումչի ուղիղ չվերթը, ինչը կարող է նպաստել դրան։ Չինաստանի հետ առանց վիզայի ռեժիմ է սահմանված, այսինքն, բերրի հողն արդեն պատրաստ է, որ մենք կարողանանք այս ուղղությունը զարգացնել։ Եթե հաջորդ տարի կարողանանք Չինաստանից Հայաստան զբոսաշրջիկներ ներգրավվել, կարող ենք համարել, որ 2025թ Զբոսաշրջության կոմիտեն հաջող աշխատանք է իրականացրել։
2025 թվականի բյուջեով նախատեսված են մի շարք ծրագրեր, մասնավորապես՝ փառատոնների կազմակերպում ինչպես Հայաստանում, այնպես էլ արտերկրում։ Հունվարի 28-ին նախատեսում ենք մասնակցել «Fitur Madrid» միջազգային զբոսաշրջային ցուցահանդեսին, արդեն կա հայկական ստենդ, աշխատանքներ են տարվում դիզայնի վրա։
Այնուհետև, նախատեսում ենք մասնակցել «ITB Berlin» միջազգային զբոսաշրջային ցուցահանդեսին, նախատեսում ենք հայկական ստենդ տեղադրել ճապոնական Օսակայում, որն այնտեղ կգործի մեկ տարի։ Այնտեղ նախատեսվում է կազմակերպել նաև ազգային ուտեստների, խմիչքների և տարազի օրեր։ Ցանկություն կա նաև այս օրերին խմիչքների համտես անցկացնել և ազգային երգ ու պար կազմակերպել։
«ԱՌԿԱ». Ընթացիկ տարվա 10 ամիսների արդյունքներով ի՞նչ ցուցանիշներ են արձանագրվել Հայաստան զբոսաշրջային այցելությունների մասով։
Լ. Գևորգյան. 2024 թվականի հոկտեմբերի վերջին գրանված տվյալներով՝ Հայաստան է այցելել 1,95 միլիոն զբոսաշրջիկ։ Ենթադրում եմ, որ նոյեմբեր-դեկտեմբեր ամիսներին այս ցուցանիշը կհասնի 2 միլիոնի։ Չափազանց հավակնոտ չհնչելու համար՝ մենք իսկապես կցանկանայինք բարելավել այս ցուցանիշը 20%-ով։ Չգիտեմ, որքանով մեզ դա կհաջողվի, այնուամենայնիվ, ես շեշտը դնելու եմ ոչ հայկական, օտարերկրյա ագրեսիվ մարքեթինգի վրա՝ Հայաստանի տեսանելիությունն ու հասանելիությունը մեծացնելու համար, մասնավորապես այն ուղղություններով, որտեղ արդեն իսկ գործում են ուղիղ չվերթեր։
Եթե չեմ սխալվում, Հայաստանի և ԱՄԷ-ի միջև օրական երեք չվերթ է իրականացվում։ Ակնկալում ենք, որ նույն ինքնաթիռներով Հայաստան կժամանեն նաև այս երկրի քաղաքացիները։
«ԱՌԿԱ». Ի՞նչ ծրագրեր է նախատեսում իրականացնել Զբոսաշրջության կոմիտեն երկրում ներքին զբոսաշրջության զարգացման համար։
Լ.Գևորգյան. Ներքին զբոսաշրջությունը ներկայումս Զբոսաշրջության կոմիտեի առաջնահերթ նպատակներից է: Ես անձամբ այցելում եմ հանրապետության մարզեր և հետազոտություններ եմ իրականացնում՝ ելնելով մարզերի հնարավորություններից։ Այս տարի մեր ֆեյսբուքյան էջում գովազդում ենք «Նոր տարին Հայաստանում» կարգախոսը։ Քանի որ ամանորյա արձակուրդները կարճ են, կոչ եմ անում մեր քաղաքացիներին անպայման Հայաստանում հանգստանալ և իրենց ներդրումն ունենալ երկրի տնտեսության մեջ։
Մեծ քաղաքներից, օրինակ՝ Երևանից, պետք է ընտանիքով և ընկերներով մեկնել մաքուր օդի, մարզերում փորձել էկոլոգիապես մաքուր սնունդ և պարզապես վայելել օրերը։
Հայաստանում ներքին զբոսաշրջության զարգացման ներուժ կա, մարդիկ պատրաստ են հյուրընկալել զբոսաշրջիկներին։ Զրուցել եմ զբոսաշրջային ծառայություններ մատուցող ընկերությունների հետ, խնդրել, որ ավելի լավ ջեռուցեն հանգստի վայրերը, առաջարկեն ամենալավ սնունդը, ավելի ցածր գներ, ինչը պայմաններ կստեղծի, որպեսզի առաջիկա տարիներին Հայաստան այցելող մարդիկ իմանան, որ այս ծառայությունը հասանելի է Հայաստանում և ունի բարձր որակ, որպեսզի մարդիկ նայեն ոչ թե հարևան երկրների ուղղությամբ, այլ Հայաստանի։
