Հայտնի է եղել, որ տարածքի մի մասը գտնվելու է մեր տարածքում, մի մասը`ոչ. ԳՇ պետի տեղակալը` Սոթքի մասին (ՎԻԴԵՈ)

<p>
<b>ԵՐԵՎԱՆ, 27 նոյեմբերի./ԱՌԿԱ/.</b> ՀՀ ԶՈւ գլխավոր շտաբի պետի առաջին տեղակալ Տիրան Խաչատրյանը հրատապ ասուլիսի ժամանակ խոսել է Սոթքի հանքավայրի շուրջ տեղի ունեցած իրավիճակի մասին։
</p>
<p>
     Նա նշել է, որ, ըստ պայմանավորվածության, հայկական զինված ուժերը և այդ տարածքի ազգաբնակչությունը երկարաձգված ժամկետով ամսի 25-ին պետք է Քարվաճառի շրջանից ամբողջությամբ դուրս եկած լինեն, որը իրականացվել է։
</p>
<p>
     Խաչատրյանի խոսքով, զորքերի հետ կապված աշխատանքներն իրականացվել են նախապես պլանավորված բնույթով։
</p>
<p>
     Խաչատրյանը նաև նշել է, որ Սոթքի տարածաշրջանում ռուսական կազմակերպության կողմից շահագործվող ոսկու հանքի տարածքից տեսանյութեր են տարածվել, որ ադրբեջանցիները անցել են հայկական տարածք, մտել են ադմինիստրատիվ կառույցներ, գրավել են:
</p>
<p>
     «Այդպիսի հարցեր չեն առաջացել, նմանատիպ իրավիճակ չի տիրել։ Թյուրիմացությունը կապված է նրա հետ, որ պետական սահմանը Սոթքի հանքի հատվածում տեղաբաշխված է գրեթե կենտրոնական մասով, և այս տարածաշրջանի հետ կապված ռուսական կողմից նախապես ձեռնարկվել էին անվտանգային միջոցառումներ՝ տարածքի պաշտպանության համար», – ասել է Խաչատրյանը: 
</p>
<p>
     ԶՈւ ԳՇ պետի առաջին տեղակալի խոսքով, պետական սահմանից հանքի եզրագծով ցանկապատվել էր, իսկ ճանապարհի վրա տեղադրվել էր անցակետ և սա կատարվել է ռուսական կողմի ուժերով և իրենց անվտանգության խնդիրները լուծելու նպատակով:
</p>
<p>
     «Մեր զորքերը այդ անվտանգության գոտու ապահովման, պահպանման, պաշտպանության խնդիրներ իրականացնելու հարցում ընդգրկվածություն չեն ունեցել: Ադրբեջանական զորքերը Քարվաճառի տարածք մտնելուց հետո հանդիպելով այդ արգելափակոցներին` խնդիր են բարձրացրել, որ սա իրենց տարածքն է: Հայկական կողմը զգուշացրել է ռուսական կողմին, որ նման խնդիր կա։ Ռուսական կողմի և Ադրբեջանը ներկայացնող համապատասխան զինվորականների հետ իրականացվել են բավական երկար բանակցություններ, որից հետո՝ չգիտեմ, թե ինչ համաձայնություն են ձեռք բերել, այդ պահպանության գոտուց համապատասխան անձնակազմը դուրս է եկել»,- նշել է նա:
</p>
<p>
     Խաչատրյանն ընդգծել է նաև, որ հայկական կողմը չունի որևէ տեղ դիրք, որը գտնվի սահմանագծից հետ։
</p>
<p>
     Նրա խոսքով, ադրբեջանական զորքերը երեկվանից են եկել այդ տարածաշրջան, երեկ էլ են փորձել այդ տարածք մտնել։
</p>
<p>
     Ըստ Խաչատրյանի, Սոթքի լեռնանցքի ճանապարհով անցնում է սահմանը։
</p>
<p>
     «Սոթքի հանքի մի մասը պատկանում է կիսով չափ մեզ, կիսով չափ ընկնում է իրենց տարածք: Հանքի շահագործողը լինելու է հանքի տերը։ Ինձ հայտնի է եղել, որ տարածքի մի մասը գտնվելու է մեր տարածքում, մի մասը`ոչ: Հայտնի է եղել, նաև որ ռուսական կողմը կազմակերպում է ամբողջական տարածքի պահպանությունը», – ասել է Խաչատրյանն `ավելացնելով, որ այդ տարածքում խաղաղապահներ ընդգրկված չեն եղել։
</p>
<p>
     Նա նաև նշել է, որ չգիտի` հետո կլինեն խաղապահներ, թե ոչ։
</p>
<p>
     Հիշեցնենք, որ Սոթքի հանքավայրի մոտով անցնում է Սոթք–Քարվաճառ մայրուղին, որը կապում էր Հայաստանն Արցախի հետ։ Այն նոյեմբերի 25–ից փակ է, քանի որ եռակողմ հայտարարության համաձայն` Քարվաճառն անցնում է Ադրբեջանի վերահսկողության տակ։ Ինչպես ԱԺ–ում հայտարարել էր անկախ պատգամավոր Թագուհի Թովմասյանը, Քարվաճառի սահմանին երեկ դրված Քարվաճառի դարպասներն այսօր արդեն կոտրվել են և ադրբեջանական կողմն առաջ է գալիս։
</p>
<p>
     Հայտնվեցին նաև տեղեկություններ այն մասին, որ ադրբեջանցի զինվորականները ներթափանցել են Վարդենիսի շրջանում գտնվող Սոթքի ոսկու հանքի տարածք։ Պաշտպանության նախարարությունն ու վարչապետի մամուլի խոսնակ Մանե Գևորգյանը հերքում են այդ լուրերը։
</p>
<p>
     «ԳեոՊրոՄայնինգ» ընկերությունը հիմնադրվել է 2011 թվականին, որը ոսկու և այլ մետաղների դիվերսիֆիկացված ռեսուրսային բազա ունեցող միջազգային մասնավոր ընկերություն է։ ԳեոՊրոՄայնինգ-ի ընկերությունները գտնվում են Ռուսաստանում և Հայաստանում։ Հայաստանում ԳեոՊրոՄայնինգին են պատկանում երկու ձեռնարկություն՝ Ագարագի պղնձա-մոլիբդենային կոմպինատը /ԱՊՄԿ/ և «ԳեոՊրոՄայնինգ գոլդ» ընկերությունը, որը մշակում է Սոթքի ոսկու հանքը և որին պատկանում է Արարատի ոսկու կորզման ֆաբրիկան։-0-<br>
</p>
<p>
     <iframe title="ՀՐԱՏԱՊ . ՀՀ ԶՈՒ ԳՇ պետի առաջին տեղակալ Տիրան Խաչատրյանի ասուլիսը" width="640" height="360" src="https://www.youtube.com/embed/HSESV3GS5jI?feature=oembed" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen="">
    </iframe> <br>
</p>