Ստանիսլավ Զասի թեկնածությունը հաստատվեց ՀԱՊԿ գլխավոր քարտուղարի պաշտոնում
ԵՐԵՎԱՆ, 29 նոյեմբերի./ԱՌԿԱ/. ՀԱՊԿ առաջնորդները 2020թ–ի հունվարի 1–ից հաստատել են Բելառուսի ներկայացուցիչ Ստանիսլավ Զասի թեկնածությունը կազմակերպության գլխավոր քարտուղարի պաշտոնում։
Այս մասին լրագրողներին հայտնել է ՀԱՊԿ գլխավոր քարտուղարի պաշտոնակատար Վալերի Սեմերիկովը (ՌԴ), տեղեկացնում է ՏԱՍՍ–ը։
«Մենք հարցեր ունեինք` կապված գլխավոր քարտուղարի նշանակման հետ։ Այսօր պետությունների ղեկավարները շնորհավորեցին Բելառուսի ներկայացուցիչ Ստանիսլավ Զասին` 2020թ.–ի հունվարի 1–ից այս պաշտոնում նշանակվելու կապակցությամբ»,– ասել է Սեմերիկովը։
Նա պարզաբանել է, որ Զասի նշանակման մասին որոշումը կայացվել է` ի կատարում Հավաքական անվտանգության խորհրդի 2015թ.–ի որոշման, «որտեղ հստակ կանոնակարգված է ռոտացիոն հիմունքով գլխավոր քարտուղարների նշանակումը` ըստ ռուսական այբուբենի, այս տարի Հայաստանն էր, 2020թ.–ի հունվարի 1–ից Բելառուսի հերթն է»։
«Համապատասխանաբար, նշանակվել է Բելառուսի ներկայացուցիչը»,– ընդգծել է Սեմերիկովը։
Նոյեմբերի 28–ին Բիշքեկում կայացել է ՀԱՊԿ անդամ երկրների առաջնորդների գագաթնաժողովը, որին մասնակցել են ՀՀ վարչապետ Նիկոլ Փաշինյանը, ՌԴ նախագահ Վլադիմիր Պուտինը, Բելառուսի նախագահ Ալեքսանդր Լուկաշենկոն, Ղրղզստանի նախագահ Սոորոնբայ Ժեենբեկովը, Ղազախստանի նախագահ Կասիմ–Ժոմարտ Տոկաևը և Տաջիկստանի նախագահ Էմոմալի Ռախմոնը։
Նոյեմբերի 26–ին Ղրղզստանի մայրաքաղաքում կայացել է ՀԱՊԿ անդամ պետությունների արտաքին գործերի նախարարների, պաշտպանության նախարարների, անվտանգության խորհրդի քարտուղարների համատեղ նիստը:
ՀԱՊԿ–ում ներառված են Ռուսաստանը, Հայաստանը, Բելառուսը, Ղազախստանը, Ղրղզստանը և Տաջիկստանը։–0–
