Հակակոռուպցիոն դատարանում մարտի 1-ի գործով դատական նիստը Քոչարյանն անվանեց «օրենքի խախտում»
ԵՐԵՎԱՆ, 11 հոկտեմբերի./ԱՌԿԱ/. Հակակոռուպցիոն դատարանում այսօր շարունակվում են ՀՀ երկրորդ նախագահ Ռոբերտ Քոչարյանի և մյուսների գործով դատական նիստերը։
Նիստը նախագահում է դատավոր Սարգիս Պետրոսյանը։
Քոչարյանից բացի, մեղադրյալների թվում են պաշտպանության նախկին նախարար Սեյրան Օհանյանը, ՀԱՊԿ նախկին գլխավոր քարտուղար Յուրի Խաչատուրովը և նախկին փոխվարչապետ Արմեն Գևորգյանը։
Քոչարյանի փաստաբան Արամ Օրբելյանը հայտարարեց, որ իր պաշտպանյալին մեղադրանք առաջադրել չեն կարող, քանի որ հոդվածը, որով ի սկզբանե առաջադրվել էր մեղադրանքը, ճանաչվել է Սահմանադրությանը հակասող և, հետևաբար, ուժը կորցրած։ Դատավոր Պետրոսյանն ի պատասխան հետաքրքրվեց, թե այդ դեպքում ինչու են եկել։ Ավելի ուշ դատավորն ասաց, որ հարցում է ուղարկվել Վճռաբեկ դատարան և որ բոլոր հարցերին կտրվեն պատասխաններ։
Քոչարյանն իր հերթին հայտարարեց, որ դատարան գալով բարի կամք է դրսևորել, թեև կարող էր ընդհանրապես չգալ կամ նստել դահլիճում, ոչ թե ամբաստանյալներին հատկացված տեղում։
«Քրեական հետապնդումը սկսվել է կոպիտ խախտումներով և օրենքն ուղղակի բռնաբարվում է»,- ասաց Քոչարյանը։
Քիչ անց նա տեղափոխվեց դահլիճ։
Փաստաբանների կարծիքով՝ Սահմանադրական դատարանի կողմից Սահմանադրությանը հակասող ճանաչված հոդվածով քրեական հետապնդումը վերսկսելն աբսուրդ է։
