ՀՀԿ-ն վարչապետի թեկնածու չի առաջադրելու (ԼՐԱՑՎԱԾ)

ԵՐԵՎԱՆ, 28 ապրիլի. /ԱՌԿԱ/. Հայաստանի հանրապետական կուսակցությունը մայիսի 1-ի վարչապետի ընտրություններում թեկնածու չի առաջադրելու, հայտարարեց ԱԺ փոխխոսնակ, ՀՀԿ խոսնակ Էդուարդ Շարմազանովը:

 «Մենք չենք առաջադրի թեկնածու: Հանրապետական խմբակցությունը կքննարկի բոլոր թեկնածություններն ու մինչև քվեարկություն կներկայացնի իր որոշումը», - ասաց Շարմազանովը շաբաթ օրը լրագրողների հետ հանդիպմանը:

Ըստ նրա, որոշումն ընդունվել է Հանրապետական խմբակցության ներկայացուցիչների կուսակցության ղեկավար՝ Սերժ Սարգսյանի ու նրա տեղակալ՝ Կարեն Կարապետյանի հետ հանդիպմանը:

«Փոխվել է քաղաքական իրավիճակը. ՀՀ-ում ներքաղաքական ճգնաժամ է: ՀՀԿ-ի համար առաջնայինը ոչ թե կուսակցության, այլ պետության շահն է: Մեզ ուժեղ Հայաստան է պետք», - հայտարարեց Շարմազանովը:

Կուսակցության որոշումը նա բացատրեց բախումից ու անկայուն վիճակից խուսափելու ցանկությամբ: Նաև նրանով, որպեսզի Հայաստանը չկիսվի երկու բևեռների:

Հանրապետությունում ապրիլի 13-ից անցկացվող բողոքի զանգվածային ակցիաների ֆոնին ապրիլի 23-ին Հայաստանի վարչապետ Սերժ Սարգսյանը հայտարարեց հրաժարականի մասին: Նույն օրը նախագահ Արմեն Սարգսյանն ընդունեց կառավարության հրաժարականը: Վարչապետի նոր ընտրությունները կկայանան մայիսի 1-ին Ազգային ժողովում: -0-