Ադրբեջանական կողմի հետ հաստատվել է հուսալի, օպերատիվ կապ. Փաշինյան
ԵՐԵՎԱՆ, 18 հոկտեմբերի. /ԱՌԿԱ/. Ադրբեջանական կողմի հետ, ինչպես և պայմանավորվել էինք, հաստատվել է հուսալի, օպերատիվ կապ։ Այս մասին այսօր լրագրողներին հայտարարեց ՀՀ վարչապետի պաշտոնակատար Նիկոլ Փաշինյանը։
«Ադրբեջանական կողմի հետ, ինչպես և պայմանավորվել էինք, հաստատվել է հուսալի, օպերատիվ կապ և կարող ենք ասել, որ փոխադարձաբար ցանկացած տեղեկատվություն կես ժամվա ընթացքում կհասնի Ադրբեջանի նախագահին, և եթե նրանց կողմից լինի` ինձ», – նշեց նա` հավելելով, որ հայ–ադրբեջանական սահմանին և Ղարաբաղ– Ադրբեջան շփման գծում իրավիճակն աննախադեպ հանգիստ է, և «դա ինչ–որ առումով Դուշանբեի համաձայնությունների արդյունքն է»։
Պատասխանելով լրագրողի այն հարցին, թե հրադադարի խախտման դեպքում անմիջապես օպերատիվ կապ է հաստատվում` Փաշինյանը նշեց. «Այնպես չի, որ ամեն դեպքում կապի մեջ ենք մտնում, ըստ անհրաժեշտության»։
Նիկոլ Փաշինյանը սեպտեմբերի վերջին մեկնել էր Դուշանբե` մասնակցելու ԱՊՀ երկրների ղեկավարների գագաթնաժողովը, որի շրջանակում Ադրբեջանի նախագահ Իլհամ Ալիևի հետ ձեռք էր բերվել պայմանավորվածություն օպերատիվ կապ հաստատելու շուրջ։–0–
