Քրեական գործ է հարուցվել Երևանի կենտրոնում բողոքի ակցիայի կապակցությամբ

ԵՐԵՎԱՆ, 23 հունիսի. /ԱՌԿԱ/. Արաբկիր և Քանաքեռ-Զեյթուն վարչական շրջանների դատախազության կողմից հարուցվել է քրեական գործ` ՀՀ  քրեական օրենսգրքի 258-րդ հոդվածի 1-ին մասով (խուլիգանություն) նախատեսված հանցագործության հատկանիշներով, հայտնում է հանրապետության գերագույն դատախազությունը։

Երեքշաբթի վաղ առավոտյան ոստիկանները ցրել են Բաղրամյանի պողոտան փակած և էլեկտրաէներգիայի թանկացման դեմ բողոքող ցուցարարներին։ Նախնական տվյալների համաձայն` ոստիկանական բաժիններ է տեղափոխվել  մոտ 240 մարդ։

«Նախօրեին ժամը 19.30-ից սկսած տևական ժամանակ մի խումբ անձինք, անօրինական հավաք, երթ, ապա նաև  նստացույց  կազմակերպելով Երևան քաղաքի Բաղրամյան պողոտայում, ամբողջությամբ    խափանել են  հասարակական տրանսպորտի  երթևեկությունը, բազմաթիվ քաղաքացիների ազատ տեղաշարժվելու սահմանադրական իրավունքը, խաթարել անդորրը`  դրանով իսկ  դիտավորությամբ խախտել են հասարակական կարգը»,– նշվում է Գերագույն դատախազության հաղորդագրությունում։

Քրեական գործը հարուցվել է, նկատի ունենալով, որ նկարագրվածի պայմաններում առկա է քրեական գործ հարուցելու օրինական  առիթը և հիմքը` ՀՀ քրեական օրենսգրքի 258-րդ հոդվածի 1-ին մասով նախատեսված հանցագործության` խուլիգանության  հանցակազմի հատկանիշների առերևույթ առկայության մասին բավարար տվյալներ։ Նույն օրը քրեական գործն ուղղվել է Հայաստանի քննչական կոմիտե նախաքննության համար։

Դեպքերի մասնակիցների ստացած մարմնական վնասվածքների հանգամանքները պարզելու նպատակով, զանգվածային լրատվամիջոցների էլեկտրոնային կայքէջերից զննվել և քրեական գործի նյութերին են կցվել մի շարք հրապարակումներ և դեպքերի վերաբերյալ տեսաձայնագրություններ:

Քննչական կոմիտեում ստեղծվել է քննչական խումբ` բաղկացած 20 քննիչներից:

Կատարվել է դեպքի վայրի զննություն: Ոստիկանության կողմից բերման ենթարկված անձանցից ՀՀ քննչական կոմիտեի քննիչների կողմից  հարցաքննվել է շուրջ 40 անձ, մի շարք անձանց հարցաքննություններ ընթացքի մեջ են:

Նշանակվել են դատաբժշկական, նյութագիտական և քրեագիտական փորձաքննություններ:

Կատարվել է հարցում Երևանի քաղաքապետարան, օպերատիվ հանձնարարականներ են տրվել ՀՀ ոստիկանության բաժիններին և Երևան քաղաքի վարչությանը:

Նախաքննությունը շարունակվում է ՀՀ քննչական կոմիտեի վարույթում:

Հայաստանի Հանրային ծառայությունները կարգավորող հանձնաժողովը (ՀԾԿՀ) հունիսի 17–ին նիստին որոշում է կայացրել էլեկտրաէներգիայի նոր սակագներ սահմանելու մասին։ Որոշման  համաձայն, էլեկտրաէներգիայի նոր սակագինը բնակչության համար կբարձրանա 6,93 դրամով` 1 կՎտ/ժ համար մինչև 48,78 դրամ ցերեկային ժամերին և մինչև 38,78 դրամ 1 կՎտ/ժ համար գիշերային ժամերին (բոլոր թվերը` ԱԱՀ հաշվի առնելով)։ Հաստատման դեպքում որոշումն ուժի մեջ կմտնի 2015թ.–ի օգոստոսի 1–ից։–0–