ՀՀ-ի համագործակցությունը Կայունացման և զարգացման Եվրասիական հիմնադրամի շրջանակներում հաջողությամբ է զարգանում, նախագահ

ԵՐԵՎԱՆ, 8 դեկտեմբերի. /ԱՌԿԱ/. Հայաստանի համագործակցությունը Կայունացման և զարգացման Եվրասիական հիմնադրամի շրջանակներում հաջողությամբ զարգանում է, նշել է  Հայաստանի նախագահ Սերժ Սարգսյանն երեքշաբթի  ՌԴ ֆինանսների նախարար, Հիմնադրամի խորհրդի նախագահ Անտոն Սիլուանովի գլխավորած պատվիրակության հետ հանդիպման ժամանակ, հայտնեցին  երկրի ղեկավարի մամուլի գրասենյակից:

Հանրապետության Նախագահը ողջունել է հյուրերին, ովքեր մեր երկրում են գտնվում Երևանում Կայունացման և զարգացման եվրասիական հիմնադրամի խորհրդի 24-րդ նիստի անցկացման կապակցությամբ: Սերժ Սարգսյանը հույս է հայտնել, որ խորհրդի երևանյան առաջին նիստը կնշանավորվի իր արդյունավետությամբ, միաժամանակ, հնարավորություն ընձեռելով մասնակիցներին՝ ծանոթանալու Հայաստանին, նրա զարգացման հնարավորություններին և ներկայիս տնտեսական վիճակին:

«Սերժ Սարգսյանը նշել է, որ Հայաստանի համագործակցությունը Կայունացման և զարգացման Եվրասիական հիմնադրամի շրջանակներում հաջողությամբ զարգանում է, և այդ առումով վկայակոչել է 2015 թվականին Հիմնադրամի միջոցների կառավարչի՝ Եվրասիական զարգացման բանկի հետ ստորագրված միանգամից երեք համաձայնագրերը: Նախագահը վստահություն է հայտնել, որ Հիմնադրամի միջոցների ֆինանսավորման հաշվին Հայաստանում հեռանկարային ներդումային և ենթակառուցվածքային նախագծերի իրականացումը, անկասկած, կնպաստի երկրի տնտեսության կարևորագույն ճյուղերի զարգացմանն ու, ընդհանուր առմամբ, սոցիալ-տնտեսական առաջընթացին»,-ասված է հաղորդագրությունում:

Հանդիպմանը զրուցակիցները համակարծիք են եղել, որ միջպետական և ազգային խոշոր ներդրումային նախագծերի իրականացումը թույլ կտա ավելի ամրապնդել Հայաստանի Հանրապետության և Հիմնադրամի մյուս անդամ պետությունների միջև ինտեգրացիոն կապերը: Անդրադարձ է եղել համագործակցության հետագա զարգացման հեռանկարին և առաջնահերթ ուղղություններին: ՀՀ Նախագահը և Կայունացման և զարգացման եվրասիական հիմնադրամի խորհրդի անդամները մտքեր են փոխանակել նաև համաշխարհային տնտեսական ներկայիս զարգացումների և առկա մարտահրավերների վերաբերյալ, որոնց դիմակայելը, նրանց համոզմամբ, միասին շատ ավելի դյուրին կլինի:

Հանդիպմանը ներկա է եղել նաև Կայունացման և զարգացման եվրասիական հիմնադրամի միջոցների կառավարիչ, Եվրասիական զարգացման բանկի վարչության նախագահ Դմիտրի Պանկինը:-0-