Ադրբեջանի Գաբալա քաղաքում տեղի է ունեցել պետական սահմանների սահմանազատման հարցերով Հայաստանի և Ադրբեջանի հանձնաժողովների 12-րդ նիստը

ԵՐԵՎԱՆ, 28 նոյեմբեր․/ԱՌԿԱ/. 2025թ. նոյեմբերի 28-ին Ադրբեջանի Հանրապետության Գաբալա քաղաքում տեղի է ունեցել Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովի և Ադրբեջանի Հանրապետության և Հայաստանի Հանրապետության միջև պետական սահմանի սահմանազատման պետական հանձնաժողովի 12-րդ հանդիպումը: Այս մասին հայտնում է ՀՀ Արտաքին գործերի նախարարությունը։

Գերատեսչության տեղեկացմամբ, հանդիպումը կայացել է Հայաստանի Հանրապետության փոխվարչապետ Մհեր Գրիգորյանի և Ադրբեջանի Հանրապետության փոխվարչապետ Շահին Մուստաֆաևի նախագահությամբ։

Գոհունակությամբ նշվել է, որ հանձնաժողովների 12-րդ հանդիպումը կայանում է կողմերից մեկի տարածքում՝ ադրբեջանական Գաբալա քաղաքում:

Հանդիպման ընթացքում կողմերը նշել են 2025թ. հունվարի 16-ի 11-րդ հանդիպման արդյունքներով ձեռք բերված պայմանավորվածությունը պետական սահմանի սահմանազատման համալիր աշխատանքները հյուսիսային հատվածից՝ Հայաստանի Հանրապետության, Ադրբեջանի Հանրապետության և Վրաստանի սահմանների հատման կետից և այնուհետև հարավային ուղղությամբ՝ հյուսիսից հարավ մինչև Հայաստանի Հանրապետության և Ադրբեջանի Հանրապետության սահմանն Իրանի Իսլամական Հանրապետության հետ սկսելու վերաբերյալ:

Կողմերը մանրամասն մտքեր են փոխանակել սահմանազատման միջոցառումների հետ կապված կազմակերպչական և տեխնիկական հարցերի շուրջ:

Քննարկվել են նաև սահմանազատման աշխատանքների իրականացման կարգի վերաբերյալ համապատասխան ուղեցույցների նախագծերը:

ՀՀ փոխվարչապետ Մհեր Գրիգորյանը և Ադրբեջանի Հանրապետության փոխվարչապետ Շահին Մուստաֆաևն առանձին մտքեր են փոխանակել փոխադարձ հետաքրքրություն ներկայացնող հարցերի շուրջ: Կողմերը պայմանավորվել են աշխատանքային կարգով համաձայնեցնել հաջորդ հանդիպման անցկացման ամսաթիվը Հայաստանի Հանրապետության քաղաքներից մեկում:

Հայ-ադրբեջանական սահմանի սահմանազատման վերաբերյալ

Ավելի վաղ ՀՀ վարչապետ Նիկոլ Փաշինյանը հաջողված էր անվանել Տավուշի մարզում, մասնավորապես՝ Ադրբեջանին սահմանակից Կիրանց գյուղի մոտ սահմանագծման և սահմանազատման գործընթացը։

2024 թվականի օգոստոսի 30-ին Երևանն ու Բաքուն ստորագրեցին «Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովի ու Ադրբեջանի Հանրապետության և Հայաստանի Հանրապետության միջև պետական սահմանի սահմանազատման պետական հանձնաժողովի համատեղ գործունեության մասին» կանոնակարգ։ Հոկտեմբերի 24-ին փաստաթուղթը վավերացվեց Երևանում և Բաքվում ՀՀ և Ադրբեջանի նախագահների կողմից։ Կանոնակարգը նախատեսում է երկու երկրների միջև ընթացակարգային հարցերի կարգավորում պետական ​​սահմանի մասին պայմանագրի ստորագրումից հետո։

Հունվարին ՀՀ փոխվարչապետ Մհեր Գրիգորյանի և Ադրբեջանի փոխվարչապետ Շահին Մուստաֆաևի նախագահությամբ պետական սահմանի ​​սահմանազատման հանձնաժողովների նիստում կողմերը համաձայնեցին սկսել սահմանազատման աշխատանքները պետական ​​սահմանի վրա հյուսիսային հատվածից՝ ՀՀ, Ադրբեջանի և Վրաստանի սահմանների հատման կետից, ապա դեպի հարավ՝ հյուսիսից հարավ, մինչև ՀՀ և Ադրբեջանի սահմանը Իրանի հետ։