ԱԳ նախարար․ Հայաստանի և Ադրբեջանի միջև նախաստորագրված պայմանագիրն ու ստորագրված հռչակագիրը բխում են երկու երկրների համար փոխշահավետությունից
ԵՐԵՎԱՆ, 27 օգոստոսի․/ԱՌԿԱ/․ Հայաստանի և Ադրբեջանի միջև նախաստորագրված պայմանագիրն ու ստորագրված հռչակագիրը բխում են և կառուցված են Հայաստանի և Ադրբեջանի համար փոխշահավետությունից, հայտարարել է ՀՀ ԱԳ նախարար Արարատ Միրզոյանը։
«Չկա մի դրույթ, որն էականորեն լավ է մի երկրի համար և էականորեն վատ է մյուսի համար։ Այդ տեքստում ամեն ինչ ծայրից ծայր փոխշահավետ է։ Այս պարագայում զարմանալի կլինի կողմերից որևէ մեկի կողմից դրա խախտումը։ Այն ունի հավասար կարևորություն և փոխադարձ պարտավորություններ երկու երկրների համար», – հայտարարել է նա Հանրային հեռուստաընկերության եթերում։
Նրա խոսքով, օգոստոսի 8–ին վաշինգտոնյան հռչակագրով արձանագրվել է, որ Հայաստանի և Ադրբեջանի միջև այլևս խաղաղություն է։ Սա արձանագրվել է հռչակագրով։ Այդ հռչակագիրը ստորագրել են Հայաստանի վարչապետը, Ադրբեջանի և ԱՄՆ–ի նախագահը՝ որպես վկա։
«Տեղի է ունեցել խաղաղության համաձայնագրի նախաստորագրում։ Այստեղ շատ կարևոր նրբերանգ կա։ Նախաստորագրմանը հաղորդվել է այնպիսի հնչեղություն և Ադրբեջանի նախագահի, և, բնականաբար, մեր վարչապետի կողմից, և Միացյալ Նահանգների նախագահի կողմից, և հետո ամբողջ աշխարհի առաջնորդների շնորհավորական ուղերձներով և անդրադարձներով, որ ընդգծվել է բոլոր կողմից, որ սրանով հաստատվում է խաղաղություն», – ասել է Միրզոյանը։
