Եթե ենթակառուցվածքները սինխրոն չբացվեն, այն լիարժեք չի աշխատի. Գրիգորյանը՝ TRIPP նախագծի մասին
ԵՐԵՎԱՆ, 27 հոկտեմբեր․/ԱՌԿԱ/. Տարածաշրջանի ենթակառուցվածքները պետք է սինխրոն բացվեն, հակառակ դեպքում ուղղակի չի աշխատի լիարժեք։ Այս մասին այսօր հայտարարել է ՀՀ փոխվարչապետ Մհեր Գրիգորյանը՝ մեկնաբանելով TRIPP նախագշի ընթացքը։
«Ըստ էության, բավականին խորը դետալիզացված քննարկվում են ենթակառուցվածքների տեսքը, ձևը և բովանդակությունը։ Դրանք բոլոր տեսակի տրանսպորտային կապերն են. և՛ էներգետիկ, և՛ ճանապարհներ, և՛ երկաթգիծ։ 42 կմ-ը երկաթգծի երկարությունն է։ Մնացած ենթակառուցվածքները դեռևս տեխնիկական զննության և բիզնես պլանավորման կարիք ունեն», - «Ազատություն» ռադիոկայանին տված հարցազրույցում ասել է Գրիգորյանը։
Նրա խոսքով՝ երկաթգծի ուղին փոփոխության ենթակա չէ, քանի որ այն ենթադրում է խորհրդային ժամանակներից մնացած երկաթգծի վերականգնում, իսկ մնացած տրանզիտ ենթակառուցվածքները հայտնի պատճառներով Խորհրդային Միության ժամանակահատվածում գոյություն չեն ունեցել, և դրանք պետք է նախագծվեն զրոյից։
«Մենք 2020-2021 թ-ից սկսած երկաթգծի ենթակառուցվածքի այդ հատվածը քննարկել ենք Երասխն էլ ներառյալ՝ Նախիջևանի գծով և մեր հարավից»,-ասել է Գրիգորյանը։
Նա պատասխանել է այն հարցին, թե արդյոք ամերիկյան կողմը նույնպես ներդրումներ կկատարի Երասխի հատվածում։
«Բոլորի համար, բոլոր կողմերի համար հասկանալի է, որ ենթակառուցվածքը շատ ավելի շահավետ կլինի, շատ ավելի խորը իմաստ կունենա և ավելի շատ ռեգիոնալ տրամաբանություն ամրապնդված կունենա, եթե Երասխի հատվածը միացած լինի։ Ըստ պայմանավորվածությունների՝ խոսքը գնում է ենթակառուցվածքային ռեգիոնալ ինտեգրացիայի մասին, նշանակում է՝ բոլոր հնարավոր կապերը պետք է իրականություն դառնան, հակառակ դեպքում՝ ենթակառուցվածքի ֆրագմենտը չի կատարի այն դերը, չի ունենա այն դերը, որի մասին մենք խոսում ենք»,-ասել է նա։
Նա հաստատել է ադրբեջանական կողմի հետ բազմաթիվ հարցերի շուրջ շփումները։
«Դե իհարկե, շփումներ կան, որովհետև, գիտեք հարցերի բազմությունը, գիտեք՝ ինչքան շատ հարց կա քննարկելու է և բնականաբար, բոլոր հարցերն, այո, անհրաժեշտ է քննակել, կոմունիկացնել և շփվել այդ խնդիրների շուրջ: Երբ մենք սկսենք ապաշրջափակման ենթակառուցվածքների կառուցապատման նախագծման աշխատանքները, երբ տեղորոշվի կոնկրետ հատվածները, որտեղ հատումը լինելու է, բնականաբար, հատման հատվածները առնվազն պիտի սահմանազատված լինեն, այլընտրանք չկա»,-եզրափակել է Գրիգորյանը։
