Իրանի նախագահը Հայաստան այցի նախաշեմին հաստատել է տարածաշրջանային համագործակցությունը զարգացնելու հանձնառությունը
ԵՐԵՎԱՆ, 18 օգոստոսի․/ԱՌԿԱ/․ Իրանի նախագահ Մասուդ Փեզեշքիանը կիրակի հանդիպում է ունեցել բարձրաստիճան պաշտոնյաների հետ՝ քննարկելու Իրանի և Հայաստանի, ինչպես նաև Բելառուսի հետ հարաբերությունները՝ այդ երկրներ կատարելիք այցերից առաջ։
Նա հայտարարել է, որ մտադիր է կենտրոնանալ իրանական մասնավոր ընկերությունների դերի բարձրացման և նախկինում ձեռք բերված համաձայնությունների, մասնավորապես՝ համատեղ ներդրումային նախագծերի առաջխաղացման վրա, գրում է Mehr-ը։
Քննարկվել են առանցքային, այդ թվում՝ էներգետիկայի, տրանսպորտի, առևտրի, ներդրումների, առողջապահության, շրջակա միջավայրի պաշտպանության, գիտության, մշակույթի և զբոսաշրջության ոլորտներում պոտենցիալ համագործակցության հարցերը: Խորհրդակցության ընթացքում քննարկվել է Հայաստանի և Ադրբեջանի միջև վերջերս կնքված՝ տրանսպորտային միջանցքի վերաբերյալ համաձայնագիրը՝ շեշտը դնելով Իրանի ազգային շահերի պաշտպանության վրա:
Անդրադարձ է կատարվել նաև Իրանի և Հայաստանի միջև առաջիկայում կնքվելիք համագործակցության համաձայնագրերին և հուշագրերին։
Փեզեշքիանը վերահաստատեց Իրանի հանձնառությունը՝ ընդլայնելու տարածաշրջանային համագործակցությունը և ամրապնդելու հարևան երկրների հետ կապերը՝ կառուցողական փոխգործակցության և փոխադարձ օգուտի միջոցով։
Ավելի վաղ հաղորդվել էր, որ Իրանի նախագահը Հայաստան կայցելի օգոստոսի 18-ին։
