Ռուսաստանը պատրաստ է ամեն կերպ աջակցել հայ-թուրքական արձանագրությունների իրագործմանը. Լավրով

ԵՐԵՎԱՆ, 23 հունիսի. /ԱՌԿԱ/. Ռուսաստանը պատրաստ է ամեն կերպ աջակցել հայ-թուրքական արձանագրությունների իրագործմանը, հայտարարել է ՌԴ ԱԳ նախարար Սերգեյ Լավրովը:

Նա ընդգծեց, որ և արձանագրությունների ստորագրումից առաջ և հետո Ռուսաստանը պատրաստակամություն է հայտնել իր ներդրումը կատարել այն ձևերով, որոնք ձեռնտու են և Հայաստանին և Թուրքիային:

«Կային ենթակառուցվածքային նախագծերի իրականացման գաղափարներ` ներառյալ նաև երկաթուղային ենթակառուցվածքները, որոնք կկարողանային իրար կապեր ժողովուրդներին և երկրներին, սահմանակից շրջանները, այս ամենը մնում է ուժի մեջ, սակայն, իհարկե, այստեղ առաջին դերը պատկանում է երկու պետություններին, որոնք ստորագրել են արձանագրությունները, և մենք պատրաստ ենք ամեն կերպ աջակցել դրանց իրագործմանը», - ասել է Լավրովը երկուշաբթի Երևանում ՀՀ ԱԳ նախարար Էդվարդ Նալբանդյանի հետ տեղի ունեցած համատեղ մամուլի ասուլիսի ժամանակ:

ՀՀ ԱԳ նախարար Էդվարդ Նալբանդյանն իր հերթին նշեց, որ «Ռուսաստանն իսկապես կարող է և փորձում է անել այն, ինչ կարողանում է»:

«Լավրովը 2009 թ.-ի հոկտեմբերին ներկա է եղել հայ-թուրքական արձանագրությունների ստորագրման արարողությանը, և դա խորհրդանշում էր Ռուսաստանի աջակցությունը հայ-թուրքական հարաբերությունների կարգավորման գործին», - ասաց Նալբանդյանը:

Նախարարը նշեց, որ Ռուսաստանի և այս գործընթացին աջակցող մյուս երկրների դիրքորոշումն արտահայտվել է բազմաթիվ հայտարարություններով`առանց նախապայմանների 2009 թ.-ի արձանագրություններում ամրագրված պայմանավորվածություններն իրականացնելու անհրաժեշտության վերաբերյալ:

Հայաստանի և Թուրքիայի միջև բացակայում են դիվանագիտական հարաբերությունները, իսկ հայ-թուրքական սահմանը պաշտոնական Անկարայի նախաձեռնությամբ փակ է 1993 թվից: Երկու երկրի միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։

Հայաստանի և Թուրքիայի հարաբերությունների կարգավորման գործընթացը 2008 թ.–ի աշնանը նախաձեռնել է ՀՀ նախագահ Սերժ Սարգսյանը։ 2009 թ.–ի հոկտեմբերի 10–ին Հայաստանի և Թուրքիայի արտգործնախարարները Ցյուրիխում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման արձանագրությունը», որոնք պետք է վավերացվեին երկու երկրների խորհրդարանների կողմից։ Սակայն 2010 թ.–ի ապրիլի 22–ին Սարգսյանը հայ–թուրքական արձանագրությունների վավերացման գործընթացը դադարեցնելու մասին հրամանագիր ստորագրեց` հայտարարելով, որ Թուրքիան պատրաստ չէ շարունակել սկսած գործընթացը։ Արձանագրությունների վավերացման գործընթացը սառեցված վիճակում է։

Մայիսի 27-ին Երևանում կայացած Հայոց ցեղասպանության 100-րդ տարելիցին նվիրված միջոցառումների համակարգման պետական հանձնաժողովի 4-րդ նիստի ժամանակ ՀՀ նախագահ Սերժ Սարգսյանը Թուրքիայի ապագա նախագահին պաշտոնապես հրավիրել է Հայաստան 2015 թ.-ի ապրիլի 24-ին, երբ նշվելու է Հայոց ցեղասպանության 100-րդ տարելիցը:-0-