Կա հակասություն պաշտպանների և տիկին Գայանեի դիրքորոշումների միջև պաշտպանության մարտավարության հետ կապված. պաշտպան (ՎԻԴԵՈ)

ԵՐԵՎԱՆ, 9 հունիսի./ԱՌԿԱ/. Դիրքորոշման փոփոխություն կա պաշտպանների և վստահորդի միջև, որի կապակցությամբ մեր պաշտպանությունն այլևս չի իրականացվելու Գայանե Մարտիրոսյանի (Հակոբյան, խմբգր.) նկատմամբ։ Այս մասին այսօր հայտարարեցին պաշտպաններ Հովսեփ Սարգսյանն ու Գևորգ Մելիքյանը` դուրս գալով դատարանից։

«Դա եղել է մեր պաշտպանյալի ցանկությունը։ Մեր պաշտպանյալի ցանկացած դիրքորոշում և ցանկություն մեզ համար ընդունելի է և հարգելի», – ասաց Սարգսյանը։

Նա նշեց, որ իրենք ներկայացրել են վերջին միջնորդությունները` տիկին Գայանեի խափանման միջոցի փոխելու հետ կապված։

«Քանի որ սույն գործով այլ հանրային պաշտպան պետք է ներգրավվի, հիմա դատարանն այդ միջոցներն է ձեռնարկում։ Կներգրավվեն, արդեն պաշտպանը կներկայացնի, մենք այլևս լիազորված չենք այս գործի շրջանակում որևէ բան հայտնելու», – ասաց Մելիքյանը։

Փաստաբանների խոսքերով, կա հակասություն իրենց և տիկին Գայանեի դիրքորոշումների միջև պաշտպանության մարտավարության հետ կապված։

«Մենք արդարացման հիմքով պետք է շարունակեինք մեր պաշտպանությունը, բայց տիկին Գայանեն այլ կարծիքի էր», – ընդգծեցին փաստաբաններն` ավելացնելով, որ տիկին Գայանեի դիրքորոշման հետ կապված նրանք լիազորված չեն որևէ հայտարարություն անել։

Սարգսյանն ու Մելիքյանը նաև նշեցին, որ Աշոտ Փաշինյանի դիրքորոշման մեջ փոփոխություն է եղել։
«Գայանե Մարտիրոսյանի (Հակոբյան,խմբգր.) ազատության մասով մեր և Աշոտ Փաշինյանի դիրքորոշումը համընկնում է», – հայտարարեցին փաստաբանները` միաժամանակ պարզաբանելով, որ խոսքը խափանման միջոցի մասին է։

44-օրյա պատերազմում զոհված զինծառայող Ժորա Մարտիրոսյանի մայրը՝ Գայանե Հակոբյանը, մայիսի 21-ին դատարանի որոշմամբ մեկ ամիս ժամկետով կալանավորվել է։ Հակոբյանը մեղադրվում է ՀՀ վարչապետ Նիկոլ Փաշինյանի որդու՝ Աշոտ Փաշինյանի առևանգման մեջ։-0-