Բերդում կանցկացվի Մեղրի և հատապտուղների ավանդական փառատոնը
ԵՐԵՎԱՆ, 19 օգոստոսի. / ԱՌԿԱ/. Մեղրի և հատապտուղների 5-րդ ամենամյա փառատոնը տեղի կունենա Տավուշի մարզի Բերդ քաղաքում օգոստոսի 21-ին, հաղորդում է ՀՀ էկոնոմիկայի նախարարության մամուլի ծառայությունը:
Տավուշի հոգևոր վերածնունդ հիմնադրամի և Տավուշի մարզի Բերդի քաղաքապետարանի կողմից կազմակերպվող փառատոնի նպատակն է` նպաստել տարածաշրջանի տնտեսական զարգացմանը՝ խթանելով տեղական ապրանքատեսակների արտադրությունը, դիրքավորելով տարածաշրջանը որոշակի արտադրական բաղադրիչներով, նպաստելով բիզնես շփումներին, ձևավորելով բարենպաստ զբոսաշրջային միջավայր։
Այցելուները կարող են համտեսել տարածաշրջանի համեղ մեղրը, հատապտուղները և ավանդական խոհանոցի ուտեստները, ծանոթանալ ավանդական արհեստագործական մշակույթին, վայելել ավանդական երգն ու պարը։
«Մեղրի և հատապտուղների փառատոնը» տարածաշրջանի ամենախոշոր միջոցառումն է, և փառատոնին մասնակցությունը սահմանամերձ տարածաշրջանի բնակչությանը զորակից լինելու յուրովի միջոց է։ Բերդ քաղաքը՝ շրջակա 16 գյուղերի հետ, հանդիսանում է Հայաստանի հյուսիս-արևելյան դարպասը և ունի 185 կմ սահման Ադրբեջանի հետ», - նշվում է հաղորդագրության մեջ։
Փառատոնի շրջանակներում տեղի կունենան Հայաստանի պետական ջազային նվագախմբի և Նարեկացի նվագախմբի բարեգործական համերգները։
Փառատոնը կազմակերպվում է Վերածննդի երիտասարդներ հիմնադրամի, Հայ խոհարարական ավանդույթների զարգացման և պահպանման հասարակական կազմակերպության, «Կանաչ արահետ» հասարակական կազմակերպությունների հետ համագործակցությամբ։ -0–
