Հայաստանից Սիրիա է մեկնել հումանիտար օգնությամբ երկրորդ ինքնաթիռը
ԵՐԵՎԱՆ, 5 հոկտեմբերի. /ԱՌԿԱ/. Երևանից Սիրիա է մեկնել հումանիտար օգնությամբ երկրորդ ինքնաթիռը, հաղորդում է ՀՀ ԱԳՆ մամուլի ծառայությունը:
Օդանավակայանում ինքնաթիռը ճանապարհում էին ՀՀ նախագահի աշխատակազմի ղեկավարի տեղակալ Վարդան Մակարյանը և Հայաստանում ՌԴ դեսպան Իվան Վոլինկինը:
Հայաստանից հումանիտար օգնությամբ առաջին ինքնաթիռը վայրէջք է կատարել Սիրիայի Հմեյմիմ ավիաբազայում նախորդ երեքշաբթի: ՀՀ ԱԳՆ–ն շնորհակալություն է հայտնել Ռուսաստանի պաշտպանության նախարարությանը` մարդասիրական օգնության տեղափոխման համար։
Ինչպես հայտնել են ՌԴ ՊՆ-ի լրատվության և զանգվածային հաղորդակցության բաժնից, առաջին չվերթով Ռուսաստանի ՊՆ-ի ավիացիայի ռազմա-տրանսպորտային Իլ-76 ինքնաթիռը Էրեբունի օդանավակայանից Սիրիա է տեղափոխել 40 տոննա պահածոացված մթերք, բանջարեղեն, ալյուրեղեն, շաքար, հաղորդում է «Ինտերֆաքսը»:
«Առաջիկայում հումանիտար պահակախմբի կազմում Սիրիայի Արաբական Հանրապետության` ռազմական գործողություններից առավել տուժած բնակավայրեր կհասցվեն սննդամթերք և հագուստ», - նշել են ՌԴ պաշտպանության նախարարությունից:
Ավելի վաղ ՀՀ ԱԳՆ-ն հաղորդել էր, որ ՀՀ նախագահ Սերժ Սարգսյանի հանձնարարությամբ՝ սիրիական հակամարտությունից տուժած բնակիչներին աջակցելու համար մոտակա օրերին երկու ինքնաթիռով Սիրիա կառաքվի մարդասիրական օգնություն։ -0-
