Հայաստանում ևս երկու մարդ է մահացել «խոզի գրիպից». ԱՆ
ԵՐԵՎԱՆ, 15 հունվարի. /ԱՌԿԱ/. Հայաստանում ևս երկու մարդ է մահացել «խոզի գրիպից», Facebook սոցցանցի էջում տեղեկացրեց ՀՀ ԱՆ պաշտոնական ներկայացուցիչ Անահիտ Հայթայանը։
«Ցավով տեղեկացնում ենք, որ չնայած վերակենդանացման բաժանմունքների մասնագետների տքնաջան պայքարին` արձանագրվել է H1N1 վարակով երկու հիվանդի մահ, որոնք բժշկական կենտրոններ են ընդունվել հունվարի 13-ին` ուշացած, ծայրահեղ ծանր վիճակում։ Երկուսն էլ ունեին քրոնիկ հիվանդություններ` շաքարային դիաբետ, սիրտ-թոքային անբավարարություն։ Միացված էին արհեստական շնչառության սարքի», – նշվում է հաղորդագրության մեջ։
Հայթայանը նշեց, որ հունվարի 15–ի տվյալներով` սուր շնչառական վարակներով ստացիոնար դիմելիությունը կազմել է 992 դեպք, որից 873-ը` 18-ից ցածր տարիքի:
502 հիվանդի մոտ հիվանդությունն ընթանում է թոքաբորբով։ Նրանցից 231-ը մինչև 18 տարեկան է։ Հիվանդանոցային բուժում է ստանում 121 հղի։
Վերակենդանացման բաժանմունքներում բուժում է ստանում սուր շնչառական վարակներով 98 հիվանդ։ Նրանցից 9-ին միացված է արհեստական շնչառության սարք:
Այսպիսով, այս պահին գրանցվել է մահվան 13 դեպք գրիպից առաջացած բարդությունների հետևանքով։ Բոլոր մահացածների մոտ հաստատվել է H1N1 վիրուսի հարուցիչը, և նրանք ունեցել են այլ քրոնիկ հիվանդություններ։
