Սուրենյանը զգուշացնում է. մոտենում են ցուրտ օդային հոսանքներ, խորհուրդ է տրվում կատարել բերքահավաք

ԵՐԵՎԱՆ, 24 հոկտեմբերի. /ԱՌԿԱ/. ՀՀ ԱԻՆ հիդրոմետ ծառայության օդերևութաբանության կենտրոնի պետ Գագիկ Սուրենյանը զգուցացրել է Հայաստանին մոտեցող արկտիկական ցուրտ օդային հոսանքների մասին։

Ըստ նրա, հոկտեմբերի 27-ի լույս 28-ի գիշերը, եղանակի պարզեցման և արկտիկական ցուրտ օդային հոսանքների ներթափանցմամբ պայմանավորված Արարատի և Արմավիրի մարզերում օդում սպասվում է 0…-2, իսկ հողի մակերևույթին` -3…-4 աստիճան ցուրտ։

«ԱԻՆ Հիդրոմետ ծառայությունը գյուղատնտեսներին խորհուրդ է տալիս նշված մարզերում կատարել բերքահավաք», – գրել է նա Facebook-ի իր էջում:

Ըստ Հայհիդրոմետծառայության, ջերմաստիճանը հոկտեմբերի 26-ի ցերեկը կնվազի 8-10, հոկտեմբերի 27-ի և 28-ի գիշերները՝ 7-9 աստիճանով։ Ամենացուրտ եղանակը կգրանցվի հոկտեմբերի 28–ի գիշերը Շիրակում և Գեղարքունիքում, ինչպես նաև Կոտայքի, Արագածոտնի և Վայոց Ձորի լեռներում, որտեղ կգրանցվի -5...-10։–0–