Ստեփանծմինդա-Լարս ավտոճանապարհը փակ է բոլոր տեսակի տրանսպորտային միջոցների համար
ԵՐԵՎԱՆ, 17 մարտի․/ԱՌԿԱ/․ Ստեփանծմինդա-Լարս ավտոճանապարհը փակ է բոլոր տեսակի տրանսպորտային միջոցների համար, հայտնում է ՀՀ Փրկարար ծառայությունը։
«Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը փակ է բոլոր տեսակի տրանսպորտային միջոցների համար», – նշվում է հաղորդագրության մեջ։
Այս մայրուղով Վրաստանում անցնում է Հայաստանից Ռուսաստան տանող միակ ցամաքային երթուղին:
«Վերին Լարս» անցակետի փակման մասին հայտնում է նաև ՌԴ Դաշնային մաքսային ծառայությունը՝ որպես պատճառ նշելով անբարենպաստ եղանակային պայմանները:
«Վրաստանի տարածքում եղանակային պայմանների վատթարացման և տրանսպորտային միջոցների անվտանգ երթևեկությունն ապահովելու անհնարինության պատճառով արգելված է երթևեկությունը Վլադիկավկազ — Լարս բնակավայր հատվածում՝ Ռուսաստանից դուրս գալու ուղղությամբ», — հայտարարել են գերատեսչությունում:
ՌԴ Դաշնային մաքսային ծառայությունից հայտնել են, որ անցակետով երթևեկությունը կվերականգնվի եղանակային պայմանների կարգավորումից հետո, և վարորդներին հորդորել են հաշվի առնել իրավիճակը ուղևորությունները պլանավորելիս:
