Ոստիկաններն այցելելու են բնակարաններ պետական ռեգիստրի հասցեներում անճշտությունները վերացնելու համար
ԵՐԵՎԱՆ, 4 օգոստոսի. /ԱՌԿԱ/. Ոստիկաններն այցելելու են բնակարաններ բնակչության պետական ռեգիստրի հասցեներում անճշտություններ հայտնաբերելու և վերացնելու նպատակով, հաղորդում է ՀՀ ոստիկանության մամուլի ծառայությունը։
«Հարգելի երևանցիներ, ՀՀ ոստիկանությունն իր իրավասության սահմաններում նախապատրաստվում է Երևան քաղաքի ավագանու արտահերթ ընտրությունների կազմակերպչական աշխատանքներին», – նշվում է հաղորդագրության մեջ։
Բնակչության պետական ռեգիստրի հասցեներում անճշտություններ հայտնաբերելու և վերացնելու նպատակով ոստիկանության ծառայողները այցելելու են բնակարաններ։
«Հայցում ենք ձեր ներողամտությունը որոշակի անհարմարություններ պատճառելու համար՝ միևնույն ժամանակ ակնկալելով աջակցություն», – ասված է ոստիկանության տարածած հաղորդագրության մեջ։
Երևանի քաղաքապետի պաշտոնը մնացել է թափուր հուլիսի 9–ին քաղաքապետ Տարոն Մարգարյանի հրաժարականից հետո։ Նոր քաղաքապետի ընտրությունները պետք է տեղի ունենային հուլիսի 16–ին Ավագանու խորհրդի արտահերթ նիստի ժամանակ, սակայն հետաձգվեցին քվորումի բացակայության պատճառով։
«Քաղաքացիական պայմանագիր» կուսակցությունն առաջադրել է դերասան Հայկ Մարությանի (կարգին Հայկո) թեկնածությունը Երևանի քաղաքապետի պաշտոնում։ ԲՀԿ–ի ցուցակի եռյակում են ԲՀԿ քաղխորհրդի քարտուղար Նաիրա Զոհրաբյանը, «Կենտրոն» հեռուստաընկերության վարող Պետրոս Ղազարյանը ու քաղաքական մեկնաբան Արման Աբովյանը։–0–
