Ադրբեջանի տարածքով Հայաստան ներկրված ռուսական հացահատիկը կստուգվի Սննդամթերքի անվտանգության տեսչական մարմնի կողմից
ԵՐԵՎԱՆ, 6 նոյեմբերի․/ԱՌԿԱ/․ Ադրբեջանի տարածքով Հայաստան ներկրված ռուսական հացահատիկը կստուգվի Սննդամթերքի անվտանգության տեսչական մարմնի կողմից։
Այս մասին Aysor.am-ին ասել է ՍԱՏՄ իրազեկման, խորհրդատվության և հանրության հետ տարվող աշխատանքների բաժնի պետ Անուշ Հարությունյանը։
«Անկախ նրանից՝ որ տարածքով է գալիս, դա ԵԱՏՄ բեռ է, նմուշառում կիրականացվի և կուղարկվի բուսասանիտարական փորձաքննության, ինչպես արվում է ՀՀ ներկրվող նմանատիպ այլ բեռների դեպքում» – ասել է նա։
Անուշ Հարությունյանը նշել է, որ բեռնափոխադրումը ԵԱՏՄ երկրների միջև է և սահմանային հսկողություն չի իրականացվում. «Բայց երբ հասնում է այն տեղը, որտեղ պետք է դատարկվի, այդտեղից մեր տեսուչները նմուշառում են իրականացնում և տալիս լաբորատոր փորձաքննության, եթե խնդիրներ լինեն, դրանց մասին կհրապարակվի», – ասել է նա։
Նշենք, որ երեկ ռուսական ցորենով բեռնված գնացքը ժամանել է Հայաստան՝ անցնելով Ադրբեջանի և Վրաստանի տարածքով։
Հոկտեմբերի 21-ին հայտարարվեց, որ Ադրբեջանի նախագահը վերացրել է իր տարածքով դեպի Հայաստան բեռների տարանցման բոլոր սահմանափակումները: Նման ճանապարհով առաջինը Ղազախստսնից դեպի Հայաստան է տեղափոխվում ցորենի խմբաքանակ։
