ԵՄ-ի ծրագրի շրջանակում Հայաստանում օգնություն է ստացել 130 հայրենադարձ

ԵՐԵՎԱՆ, 9 սեպտեմբերի. /ԱՌԿԱ/. Հայաստանում Եվրամիության կողմից իրականացվող «Թիրախային նախաձեռնություն Հայաստանի համար» ծրագրի շրջանակում օգնություն է ստացել 130 հայրենադարձ, հայտարարեց ծրագրի տնօրեն Վիրժինի Արտոն:

«Այդ մարդիկ ստացան մասնագետների խորհրդատվությունը, նրանց երեխաները կարողացան ուսումնասիրել հայոց լեզուն, իսկ մեծահասակներին հնարավորություն ընձեռվեց ստանալ աշխատանքի տեղավորման համար անհրաժեշտ կրթություն», - ասաց Արտոն երեքշաբթի մամուլի ասուլիսի ժամանակ:

«Թիրախային նախաձեռնություն Հայաստանի համար» ծրագիրը ԵՄ-ի ծրագիրն է, որն արժե 3 մլն եվրո, այն իրականացվում է երեք տարի ժամկետով: Ծրագիրն իրականացվում է ԵՄ 8 անդամ-պետությունների կողմից Ֆրանսիայի միգրացիայի և ինտեգրման գործակալության (OFII) ղեկավարությամբ: Ծրագրի շրջանակում աջակցություն է տրամադրվում հայերի հայրենիք վերադառնալու գործընթացին և նրանց ակտիվ վերաինտեգրմանը: Ծրագիրը մեկնարկել է 2012թ.-ի դեկտեմբերին:

Արտոն պարզաբանեց, որ հայրենադարձները վերադարձել են տարբեր երկրներից, այդ թվում նաև ԵՄ պետություններից:

Արշավի համակարգող Լուսինե Գրիգորյանը նշեց, որ 2014 թ.-ի հունվարից «Թիրախային նախաձեռնություն Հայաստանի համար» ծրագրի շրջանակում մեկնարկեց «Միգրացիայի կողմնացույց» արշավը, որի նպատակն է իրազեկել հասարակությանը անօրինական միգրացիայի ռիսկերի մասին: Արշավը կտևի մինչև 2015 թ.-ի հունվար:

«Արշավի նպատակն է  բարձրացնել բնակչության իրազեկվածության մակարդակը անօրինական միգրացիայի ռիսկերի և հնարավոր խնդիրների մասին, ինչպես նաև տեղեկացնել օրինական միգրացիայի հնարավորությունների մասին», - ասաց Գրիգորյանը:

Նա ներկայացրեց արշավի բաղադրիչներն ու նրա գործիքները՝ լրագրողների համար նախատեսված դասընթացներ  և «Ճամպրուկ» ամենամյա մրցանակաբաշխությունը թեման լուսաբանող լրագրողների համար, սոցիալական հոլովակներ և թոք-շոուներ, թռուցիկներ, կայքի ստեղծում և Facebook-ի էջ:

Միգրացիայի հարցերով ԵԱՀԿ փորձագետ Դավիթ Թումասյանը ևս մեկ անգամ հիշեցրեց հավաքվածներին այն ռիսկերի մասին, որոնց ենթարկվում են Եվրոպա ձգտող անօրինական միգրանտները:

«Անօրինական միգրանտներն աշխատելու իրավունք չունեն, նրանք թաքնվում են ոստիկանությունից և բնակվում են արտաքսման մշտական վտանգի տակ: Նրանք դառնում են անօրինական շահագործման և թրաֆիքինգի զոհեր», - ասաց փորձագետը:

Անօրինական միգրացիայի և նրա դինամիկայի վիճակագրության մասին հարցին փորձագետը պատասխանեց, որ իրենք նման վիճակագրություն չունեն:

Պաշտոնական վիճակագրության տվյալների համաձայն՝ 2008-2013 թթ.-ին Հայաստանից հեռացել է ավելի քան 210 հազար մարդ:

ԱՎԾ-ի տվյալներով` Հայաստանի բնակչությունը 2014 թ.-ի հունվարի 1-ի դրությամբ կրճատվել է 9,5 հազար մարդով՝ նախորդ տարվա սկզբի համեմատ: Հունվարի 1-ի դրությամբ Հայաստանի մշտական բնակչության թիվը կազմել է 3 017,4 հազար մարդ, որոնցից 1 914,3 հազարը բնակվում է քաղաքներում, 1 103,1 հազարը՝ գյուղական համայնքում:-0-