Փաշինյան. մյուս տարի ներդրվելու է համընդհանուր հետվճարի համակարգ
ԵՐԵՎԱՆ, 27 հոկտեմբերի․/ԱՌԿԱ/․ Հայաստանում կներդրվի անկանխիկ առևտրից համընդհանուր հետվճարի համակարգ: Այս մասին հայտարարեց վարչապետ Նիկոլ Փաշինյանը ԱԺ–ում 2026թ․–ի պետբյուջեի նախագծի քննարկման ժամանակ։
«Մյուս տարի ներդնելու ենք համընդհանուր հետվճարի համակարգ: Բոլոր քաղաքացիները անկանխիկ առևտրի դեպքում 2 տոկոսը հետվճարի ձևով կստանան»,-ասաց Փաշինյանը։
Ինչպես իր հերթին նշեց Վահե Հովհաննիսյանը` ծրագիրը վերջնականացման փուլում է և նախատեսվում է գործարկել 2026 թվականի հունվարի 1-ից։
«Այս ծրագիրը մշակել ենք ArCa վճարային համակարգի հետ միասին։ Հետվճար ստանալու են բոլոր այն քաղաքացիները, որոնք ունեն ArCa քարտեր», - ասաց նախարարը։
Նրա խոսքով՝ սահմանվել է երկու նպատակ՝ շարունակել ստվերային տնտեսության դեմ պայքարը և անկանխիկ գործարքների քաղաքականությունը, ինչպես նաև նպաստել ազգային վճարային համակարգի կայացմանը և բարելավմանը։
Հովհաննիսյանը հիշեցրեց, որ կառավարության վերջին որոշման համաձայն՝ 2026 թվականի հունվարի 1-ից կենսաթոշակառուների և նպաստառուների համար նախատեսված cashback վճարը 12%-ից կբարձրացվի մինչև 20%:
«2026 թվականի պետական բյուջեի նախագծով այս նպատակի համար հատկացված է 20 միլիարդ դրամ, ինչը 7.5 միլիարդ դրամով ավելի է, քան 2025 թվականին», - ասաց Հովհաննիսյանը:
ՀՀ-ում կենսաթոշակառուների և նպաստառուների համար նախատեսված cashback ծրագիրը գործում է 2022 թվականի հուլիսի 1-ից։ Սկզբում նրանք ստանում էին ամսական ծախսերի 10% cashback (ամսական առավելագույնը մինչև 5000 դրամ), հետագայում cashback-ը ավելացավ մինչև 12% (ամսական առավելագույնը մինչև 6000 դրամ)։ Գումարը վճարվում է մինչև հաջորդ ամսվա 25-ը։
2025 թվականի սեպտեմբերի 25-ին ՀՀ կառավարությունը հատկացրեց մոտ 3.22 միլիարդ դրամ՝ կենսաթոշակառուների և նպաստառուների համար cashback ծրագիրը մինչև տարեվերջ շարունակելու համար։ Հայտարարվեց նաև, որ ծրագիրը կշարունակվի 2026 թվականին։ ($1 - 383.05 դրամ)։
