Երևանի «Զվարթնոց» օդանավակայանի մաքսատունը վերազինվել է նոր տեխնիկական սարքավորմամբ

ԵՐԵՎԱՆ, 18 հուլիսի. /ԱՌԿԱ/.  «Զվարթնոց» օդանավակայանի մաքսատունը նոր տեխնիկական սարքավորում է ներմուծել, այդ թվում՝ ուղևորային համալիրում ուղեբեռի ստացման  համար նախատեսված ևս 2 ժապավենների համալրմամբ, «ԱՌԿԱ» գործակալությանը հաղորդեցին Պետեկամուտների կոմիտեի տեղեկատվության և հասարակայնության հետ կապերի բաժնից։

«Տեխնիկական վերազինման արդյունքում այժմ ավելի քան 50 տոկոսով արագացվել է ուղևորների սպասարկման գործընթացը, իսկ շնորհիվ ավելացած ժապավենների այժմ մաքսավորները միանգամից 6 կետից են հետևում գործընթացին, ընդ որում,  ուղևորից աննկատ` տեղադրված հատուկ տեխնիկայի` «Ռապիսկան» տեսակի զննող ներսադիտակների և սարքավորումների միջոցով»,- ասաց «Զվարթնոց» օդանավակայանի մաքսատան պետ Սամվել Սաֆարյանը։

Հաղորդագրության համաձայն` վերջերս ձեռք են բերվել ևս 7 համակարգիչներ, ընդլայնվել են  «կանաչ», «կարմիր» ուղիները:

Բացի այդ, ըստ Սաֆարյանի՝ մաքսատանը նաև բանկային մասնաճյուղ է բացվել, ինչը հնարավորություն է տալիս սահմանված չափը գերազանցող ուղեբեռի դեպքում, ի տարբերություն նախկին կարգի, ձևակերպումները նույն պահին իրականացնել` առանց մաքսատնից դուրս գալու։

Այստեղ ևս նորագույն այդ տեխնիկայի կիրառմամբ ավելի են հեշտացվում բեռների ընդունումը, մշակումն ու պահպանումը:  Ի դեպ, փչացող ապրանքը քաղաքացիներն անհրաժեշտության դեպքում կարող են ի պահ հանձնել ժամանակակից սառնարանում:

Բեռնահամալիրում նաև  շուրջօրյա հերթապահություն է սահմանված բոլոր ծառայությունների կողմից: -0-