Յուրա Մովսիսյանը հունիսի 13–ին չի մասնակցի Հայաստան–Պորտուգալիա խաղին. ՀՖՖ
10.06.2015,
13:07
Հայաստանի հավաքականի և Մոսկվայի «Սպարտակի» հարձակվող Յուրա Մովսիսյանը վանսվածքի պատճառով հունիսի 13–ին Երևանում չի մասնակցի Պորտուգալիայի հետ Եվրո-2016 ընտրական փուլի խաղին, հայտնում է Հայաստանի ֆուտբոլի ֆեդերացիայի կայքը։
ԵՐԵՎԱՆ, 10 հունիսի. /ԱՌԿԱ/. Հայաստանի հավաքականի և Մոսկվայի «Սպարտակի» հարձակվող Յուրա Մովսիսյանը վանսվածքի պատճառով հունիսի 13–ին Երևանում չի մասնակցի Պորտուգալիայի հետ Եվրո-2016 ընտրական փուլի խաղին, հայտնում է Հայաստանի ֆուտբոլի ֆեդերացիայի կայքը։
Հայաստանի ազգային հավաքականի գլխավոր մարզչի ժամանակավոր պաշտոնակատար Սարգիս Հովսեփյանի թույլտվությամբ, հունիսի 9-ի երեկոյան մարզիկը մեկնել է ԱՄՆ հետազոտման:
Ինչպես ՀՖՖ պաշտոնական կայքին տեղեկացրել է Սարգիս Հովսեփյանը, Յուրա Մովսիսյանը հրավիրվել էր Հայաստանի ազգային հավաքականի մարզական հավաքին, որովհետև նախնական հետազոտությունները ցույց էին տվել, որ ֆուտբոլիստը կհասցներ վերականգնվել մինչև Պորտուգալիայի հավաքականի հետ հանդիպումը:
«Մարզական հավաքի հինգ օրերի մարզումները ցույց տվեցին, որ լիովին վերականգնվել և պատրաստ լինել առաջիկա հանդիպմանը հնարավոր չէ: Մարզչական շտաբի և բժշկական անձնակազմի հետ որոշում կայացվեց թույլատրել, որպեսզի Յուրան մինչև իր ակումբ վերադառնալը լրացուցիչ հետազոտություն անցնի ԱՄՆ-ում, ինչի հնարավորությունը կար, և ես թույլատրեցի նրան դադարեցնել իր մասնակցությունը հավաքին և մեկնել ԱՄՆ», - ասաց Սարգիս Հովսեփյանը:
Եվրոպայի 2016 թվականի առաջնության ընտրական փուլի խաղը Հայաստանի և Պորտուգալիայի հավաքականների միջև կկայանա հունիսի 13–ին տեղական ժամանակով 20։00–ին Երևանի Հանրապետական մարզադաշտում։
Հայաստանի հավաքականն ընտրական փուլում մեկ միավորով կիսում է վերջին տեղը սերբերի հետ։ Սակայն հայ ֆուտբոլիստները չորս խաղ են անցկացրել` մեկ խաղով ավելի, քան սերբերը։
Խմբում ինը միավորով չորս խաղից հետո առաջատար են պորտուգալացիները, յոթական միավոր ունեն Ալբանիայի (երեք խաղ) և Դանիայի (չորս խաղ) հավաքականները։ -0-
