ՏԵՂԵԿԱՆՔ. Հայաստանի սպորտի և երիտասարդության հարցերի նախարար Յուրի Վարդանյանի կենսագրությունը

ԵՐԵՎԱՆ, 8 մայիսի. /ԱՌԿԱ/. Հայաստանի սպորտի և երիտասարդության հարցերի նախարար է նշանակվել Յուրի Վարդանյանը։ Համապատասխան հրամանագիրը Հայաստանի նախագահ Սերժ Սարգսյանը ստորագրել է մայիսի 8–ին։

Յուրի Վարդանյանը ծնվել է 1956 թվականի  հունիսի 13–ին Լենինական քաղաքում (այժմ` Գյումրի)։

1980 թվականին ավարտել է  Լենինականի Մ. Նալբանդյանի անվան պետական մանկավարժական ինստիտուտի ֆիզիկական դաստիարակության ֆակուլտետը` ստանալով ֆիզիկական կուլտուրայի ուսուցչի որակավորում։

1984-1987 թթ. սովորել է Երևանի Ժողովրդական տնտեսության ինստիտուտի «Ժողովրդական տնտեսության պլանավորում» ֆակուլտետում, ստացել է տնտեսագետի որակավորում։ Զուգահեռ մասնակցել է ծանրամարտի Եվրոպայի, աշխարհի, ԽՍՀՄ առաջնություններին, ինչպես նաև Օլիմպիական խաղերի։

ԽՍՀՄ բազմակի չեմպիոն է, Աշխարհի 9-ակի չեմպիոն, Եվրոպայի 8-ակի և  օլիմպիական խաղերի չեմպիոն: Աշխարհի 43–ակի ռեկորդակիր։

1986-1988 թվականներին եղել է Լենինականի արհմիությունների սպորտընկերության նախագահ, 1989-1991 թվականներին`  Արհմիությունների հանրապետական սպորտընկերության նախագահ։ 1991-1993 թվականներին` ԱՄՆ-ի ծանրամարտի հավաքականի  խորհրդատու-մարզիչ, 1994-1997 թթ.–ին` ԱՄՆ-ի պրոֆեսիոնալ բասկետբոլի «Չիկագո-բուլս» թիմի` ֆիզիկական պատրաստվածության գծով մարզիչ։

2003-2008 թվականներին եղել է Կալիֆոռնիայի «Հայերի միության» նախագահ։

Նախքան  ՀՀ սպորտի և երիտասարդության հարցերի նախարարի պաշտոնը զբաղեցնելը ՀՀ նախագահի խորհրդական է եղել։

Պարգևատրվել է Լենինի, «Աշխատանքային կարմիր աստղ», «Սուրբ Մեսրոպ Մաշտոց», ԼՂՀ «Մեսրոպ Մաշտոց» շքանշաններով: Եղել է ՀՍՍՀ Գերագույն Սովետի 10-րդ և 11-րդ գումարման դեպուտատ: ԽՍՀՄ սպորտի վաստակավոր վարպետ է։
 
Ամուսնացած է, ունի երեք որդի։ -0-