2026 թ.-ին Հայկական ատոմակայանը վերանորոգման նպատակով կկանգնեցվի սովորականից ավելի երկար. ՀԾԿՀ նախագահ
ԵՐԵՎԱՆ, 17 նոյեմբեր․/ԱՌԿԱ/. 2026 թ.-ին Հայկական ատոմակայանը (ՀԱԷԿ) կանգառի մեջ կլինի հինգ ամսով, ինչը սովորականից երեք ամսով ավելի է, երկուշաբթի կայացած ասուլիսի ժամանակ հայտարարել է Հանրային ծառայությունները կարգավորող հանձնաժողովի (ՀԾԿՀ) նախագահ Մեսրոպ Մեսրոպյանը։
«Ինքներդ եք հասկանում, որ ատոմակայանի պես էլեկտրակայանը և նաև էժան էլեկտրաէներգիայի աղբյուր հանդիսացող ռեսուրսը, երբ որ չի աշխատում, ինքնաբերաբար դա բացասական ազդեցություն է ունենալու ընդհանուր սակագնի վրա։ Բայց մենք, քանի որ ունենք այլ կետերով արդեն ձևավորված օգուտներ և ֆինանսական բարձիկներ, կփորձենք դրանով մեղմել այդ հանգամանքը և վերջնարդյունքը կտեղեկացնենք ձեզ»,–ասել է նա։
Այս համատեքստում նա նշել է, որ ՀԾԿՀ աշխատակազմը, ինչպես միշտ, տարեվերջին արդեն ուսումնասիրում է էլեկտրաէներգիայի սակագների փոփոխության հնարավորությունը, հաշվի առնելով բոլոր գործոնները (սակագնային բաղադրիչները)։ Մեսրոպյանը վստահեցրել է, որ արվում է հնարավոր ամեն ինչ սակագների բարձրացումը կանխելու համար։
