Հայաստանում գյուղատնտեսական կոոպերատիվներին տեխնիկական աջակցություն ցուցաբերելու համար ԵՄ–ն 3.4 մլն եվրո կտրամադրի

ԵՐԵՎԱՆ, 10 հունիսի. /ԱՌԿԱ/. Եվրոպական հարևանության գյուղատնտեսության և գյուղական համայնքների զարգացման (ENPARD) եռամյա ծրագրի շրջանակում Հայաստանում գյուղատնտեսական կոոպերատիվներին տեխնիկական աջակցություն ցուցաբերելու համար 3.4 մլն եվրո կհատկացվի, չորեքշաբթի Հայաստանում ԵՄ պատվիրակության միջազգային համագործակցության պատասխանատու Ջոն Բարքերը։

2015թ.–ի հունվարին մեկնարկած ծրագրի շրջանակում ԵՄ–ն Ավստրիական զարգացման գործակալության հետ համատեղ 25 մլն եվրո է տրամադրել գյուղատնտեսական հատվածի և գյուղական համայնքների կայուն և համապարփակ զարգացման համար։ Լրացուցիչ 1 մլն եվրո տրամադրել է Ավստրիայի կառավարությունը Շիրակի, Լոռու և Տավուշի մարզերում ծրագրի նպատակներին հասնելու համար։ Ծրագիրն իրականացնում են UNDP (ՄԱԿ–ի զարգացման ծրագիր), FAO (ՄԱԿ-ի պարենային և գյուղատնտեսական կազմակերպություն), UNIDO (ՄԱԿ-ի արդյունաբերական զարգացման կազմակերպություն) կազմակերպությունները։

Բարքերի խոսքով` ծրագիրը կարևոր է Հայաստանի գյուղատնտեսության զարգացման համար, քանի որ միտված է  կենսամակարդակի բարձրացմանն ու  ֆերմերների և գյուղական համայնքների տնտեսական պայմանների բարելավմանը։

«Մենք ուզում ենք օգնել հայ ֆերմերներին, որպեսզի նրանք ավելի շատ և ավելի որակյալ արտադրանք տան և ավելի խոշոր շուկաներում իրացնեն այդ արտադրանքը», – նշել է նա:

Նրա կարծիքով, հաշվի առնելով այն հանգամանքը, որ Հայաստանում գյուղատնտեսությունն ունի հատվածական կազմ, այդ պատճառով մենք համաձայնություն ենք ձեռք բերել միավորել ֆերմերներին, հիմնել կոոպերատիվներ։ UNDP–ն և UNIDO–ն կաջակցեն այդ միությունների ստեղծման հարցում։

«Մեր հիմնական ուշադրությունը կկենտրոնացնենք արտադրանքի վրա։ Մենք գիտենք` ինչ է արտադրվում Հայաստանում, սակայն մենք ուզում ենք, որ ապրանքներն ունենան ավելի մեծ ավելացված արժեք։ Դա հնարավորություն կընձեռի իրացնել ապրանքները շուկայում ավելի բարձր վճարունակության պահանջարկով», – ասաց նա։

Բարքերը նշեց, որ Լոռու մարզում հաջողությամբ իրականացվել է ծրագրի փորձնական մասը։

Ծրագրին մասնակցող խմբերը պետք է կազմված լինեն տարբեր ընտանիքներ ներկայացնող և գյուղական համայնքներում գրանցված, բնակվող և գործունեություն ծավալող առնվազն 5 ֆերմերից կամ 5 հիմնադիր անդամից: Խմբերը պետք է հանդիսանան գրանցված կոոպերատիվ, չգրանցված՝ ոչ ֆորմալ և նոր ստեղծվող խումբ, խմբերը պետք է ունենան բիզնես ուղղվածություն:

20 մլն եվրոն կտրամադրվի երեք տրանշով`5 մլն եվրոն` 2015թ.–ին, 7-ական մլն եվրո` 2016 և 2017 թվականներին։ Ծրագիրն իրականացվելու է 36 ամսում ՀՀ Շիրակի, Լոռու, Գեղարքունիքի, Արագածոտնի, Կոտայքի և Վայոց Ձորի մարզերում: -0-