Ղազախստանը պատրաստ է կանոնավոր հիմունքներով Հայաստան մատակարարել հացահատիկ և այլ արտադրանք․ Տոկաև
ԵՐԵՎԱՆ, 21 նոյեմբերի․/ԱՌԿԱ/․ Ղազախստանը պատրաստ է կանոնավոր հիմունքներով Հայաստանին մատակարարել հացահատիկ և այլ արտադրանք, հայտարարել է Ղազախստանի նախագահ Կասիմ-Ժոմարտ Տոկաևը Աստանայում Հայաստանի վարչապետ Նիկոլ Փաշինյանի հետ ճեպազրույցի ժամանակ։
«Ընթացիկ տարվա նոյեմբերին Ադրբեջանի տարածքով Հայաստան է մատակարարվել ղազախական ցորենի առաջին խմբաքանակը՝ 1 հազար տոննա չափով։ Այս նախաձեռնությունն ունի հատուկ քաղաքական և տնտեսական նշանակություն», - նշել է Տոկաևը։ Նրա խոսքերը հրապարակում են տեղական ԶԼՄ-ները։
Նա հայտարարել է, որ Ղազախստանը պատրաստ է կանոնավոր հիմունքներով Հայաստանին մատակարարել բարձրորակ հացահատիկային արտադրանք և այլ ապրանքներ։
«Մենք պայմանավորվեցինք գործադրել բոլոր անհրաժեշտ ջանքերը այդ ուղղության հետագա զարգացման համար։ Առաջնահերթ խնդիրներից մեկը երկու երկրների միջև ուղիղ ավիահաղորդակցության բացումն է և օդային բեռնափոխադրումների կազմակերպումը։ Այս ոլորտում արդեն կան կոնկրետ ծրագրեր, կողմերը մոտ ժամանակներս ձեռնամուխ լլինեն դրանց իրականացմանը», – ասել է Տոկաևը։
ՀՀ վիճակագրական կոմիտեի տվյալներով՝ 2025 թվականի հունվար-սեպտեմբերին Հայաստանից Ղազախստան արտահանման ծավալը կազմել է $41 633.8 հազար, անկումը՝ 8%։
