Գյուղատնտեսության ոլորտում բարեփոխումները պետք է լինեն իրական, հողի վրա․ Սամվել Կարապետյան
ԵՐԵՎԱՆ, 8 սեպտեմբերի․/ԱՌԿԱ/․ «Տաշիր գրուպ»–ի նախագահ Սամվել Կարապետյանը ներկայացրել է մի շարք լուծումներ Հայաստանի ժողովրդի բարեկեցության համար, որը նրա թիմը կարող է օպերատիվորեն ապահովել։
«Հայաստանը տարեկան ներմուծում է մոտ 4 մլրդ դոլարով ավելի ապրանք, քան արտահանում է: Սա նշանակում է, որ առկա է մեծ պոտենցիալ մեր երկրում արտադրությունների կառուցման, շահավետ ներդրումային ծրագրեր ստեղծելու համար՝ հատկապես շրջանների բնակիչներին ապահովելով արժանապատիվ աշխատանքով», – ասվում է Կարապետյանի ուղերձում, որը նա հղել է ԱԱԾ մեկուսարանից։
Նա նշել է, որ շատ կարճ ժամանակում կարելի է ներգրավել միջազգային խոշոր ներդրողների՝ իրենց արտադրական հզորություններով, խթանել տեղական բիզնեսը՝ թիրախային պետական աջակցության ծրագրերով, այլ ոչ թե «փայ մտնել», կամ փորձել «խլել»:
«Գյուղատնտեսության ոլորտում բարեփոխումները պետք է լինեն իրական, հողի վրա. գյուղացու բերքը մթերող ընկերությունների մեջ այնքան շատ մրցակցություն պետք է լինի, որ ապրանքը վաճառելով՝ գյուղացին վերջապես շահույթ պետք է կարողանա ստանալ՝ ապահովելով իր ընտանիքի բարեկեցությունը: Իսկ մեր գյուղմթերքը լավ հումք կարող է լինել սննդի արդյունաբերության զարգացման», – նշել է նա։
Կարապետյանի խոսքով, մի քանի տարում միջազգային ճանաչում ունեցող խոշոր ընկերությունները պետք է լինեն ներկայացված Հայաստանում և գործունեություն ծավալեն մեր երկրում, որի միջոցով ապահովվելու է տուրիզմի զարգացման տեմպերի որակապես նոր աճ ու նոր պայմաններ:
ԱՎԾ–ի վերջին տվյալների համաձայն՝ Հայաստանի արտաքին առևտրաշրջանառությունը 2025 թվականի հունվար-հուլիսին, 2024 թվականի նույն ժամանակահատվածի համեմատ, նվազել է 42%-ով և կազմել 11.4 միլիարդ դոլար։ Միևնույն ժամանակ, Հայաստանից արտահանումը այս ժամանակահատվածում նվազել է 49.6%-ով՝ հասնելով 4.4 միլիարդ դոլարի, իսկ ներմուծումը կազմել է մոտ 7 միլիարդ դոլար՝ 35.8% անկման դեպքում։
