Հայկական արժույթի փոխարժեքը կարող է վերադառնալ նորմալ 5-10 դրամ մարժայի արդեն 2014-ի վերջին – 2015-ի սկզբին

ԵՐԵՎԱՆ, 19 դեկտեմբերի. /ԱՌԿԱ/. Հայկական արժույթի փոխարժեքը կարող է վերադառնալ նորմալ 5-10 դրամ մարժայի արդեն 2014-ի վերջին – 2015-ի սկզբին, ուրբաթ լրագրողներին ասաց իշխող Հանրապետական կուսակցությունից ԱԺ պատգամավոր, ֆինանսավարկային և բյուջետային հարցերի խորհրդարանական  հանձնաժողովի ղեկավար Գագիկ Մինասյանը։  

«5-10 դրամ մարժան վերջին տարիներին բնական է դարձել հայկական շուկայի համար և վկայում է երկրում կայուն իրավիճակի և շուկայում շահարկումների բացակայության մասին», - ասաց Մինասյանը։  

Նրա խոսքերով` հայկական դրամի արժեզրկումը կապված էր երկու գործոնի հետ, որոնցից առաջինը կապված էր դոլարի ամրապնդման, երկրորդը` ռուբլու զգալի արժեզրկման և նավթի գնի անկման հետ, ինչն ազդեց նաև հայկական շուկայի վրա։

Նա նշեց, որ իրավիճակը խորացավ հասարակության այն հատվածի շրջանում  սկսված իրարանցումով, որն ի վիճակի չէ ինքնուրույն կողմնորոշվել ֆինանսական շուկայում։

«Ստեղծված իրավիճակում բնակիչները պետք է զերծ մնային ավելորդ փոխարկումներից, իսկ տնտեսվարող սուբյեկտները պետք է ավելի մեծ բարեխղճություն ցուցաբերեին և թույլ չտային գների անհիմն բարձրացում», - ասաց Մինասյանը։

Այս իրավիճակում, ինչպես կարծում է պատգամավորը, ՀՀ Կենտրոնական բանկը խելամիտ քաղաքականություն վարեց` փորձելով իր հայտարարություններով զսպել շուկայում առաջացած անհիմն իրարանցումը։

Մինասյանը կարծում է, որ ԿԲ-ն բոլոր քայլերն իրականացրեց ժամանակին և հիմնավորված կերպով։

Հայաստանում արտարժույթի փոխարժեքի կտրուկ բարձրացում գրանցվեց նոյեմբերի 24–ին, երբ փոխարժեքն ավելացավ 16,6 կետով` հասնելով 1 դոլարի դիմաց 435 դրամի և թարմացնելով 8 տարվա առավելագույն ցուցանիշը։ Դրամի արժեզրկումը շարունակվեց, և դեկտեմբերի 17-ին դոլարի պաշտոնական փոխարժեքը բարձրացավ միանգամից 36,86 կետով և 527,20 դրամ կազմեց` տարեսկզբի համեմատ ավելանալով 29,9%–ով։ Արդեն դեկտեմբերի 18-ին դոլարի միջին շուկայական փոխարժեքը իջավ 30,2 կետով` մինչև 497 դրամ $1 համար։—0--