ԵԱԶԲ–ն 100մլն դրամ է ուղղել ՀՀ–ում ջրհեղեղի հետևանքները վերացնելու համար
ԵՐԵՎԱՆ, 20 հունիսի․/ԱՌԿԱ/․ Եվրասիական զարգացման բանկը (ԵԱԶԲ) օգնություն է ուղարկել Հայաստանի Հանրապետություն՝ 2024 թվականի մայիսի 25-26-ը տեղի ունեցած բնական աղետի հետևանքները վերացնելու համար։ Այս մասին հայտնում է բանկի մամուլի ծառայությունը։
Հորդառատ անձրևների հետևանքով ամբողջ երկրում գրանցվեց տեղումների ամսական նորմա, ինչից տուժել են տեղի բնակիչները, տրանսպորտային և էներգետիկ ենթակառուցվածքը, խաթարվել է երկաթուղային և ճանապարհային հաղորդակցությունը։
«Հաշվի առնելով Հայաստանի հյուսիսային շրջաններում տեղի ունեցած ջրհեղեղի ծանր հետևանքները՝ ԵԱԶԲ-ն որոշել է տրամադրել 100 միլիոն հայկական դրամի ֆինանսական աջակցություն։ Այս գումարը կուղղվի ՀՀ ֆինանսների նախարարություն՝ հետագա բաշխման համար»,- ասել է ԵԱԶԲ խորհրդի նախագահ Նիկոլայ Պոդգուզովը։
Մայիսի 25-26-ը տեղացած տեղումների, ինչպես նաև Դեբեդ, Աղստև և Տաշիր գետերի վարարման հետևանքով արտակարգ իրավիճակ է ստեղծվել Տավուշում և Լոռիում։ Բնական աղետը խլել է 4 մարդու կյանք, ավելի քան 440 մարդ փրկվել ու տարհանվել է։ Այս երկու մարզերի՝ ջրհեղեղից տուժած բնակավայրերը հայտարարվել են աղետի գոտի, վերականգնողական աշխատանքների համար հատկացվել է 300 մլն դրամ։
Եվրասիական զարգացման բանկը (ԵԱԶԲ) զարգացման բազմակողմ բանկ է, որը ներդրումային գործունեություն է իրականացնում եվրասիական տարածքում։ Ավելի քան 18 տարի ԵԱԶԲ-ն նպաստում է տնտեսական կապերի ամրապնդմանը և ընդլայնմանը և իր անդամ երկրների համակողմանի զարգացմանը։ ԵԱԶԲ-ի կանոնադրական կապիտալը կազմում է 7 միլիարդ ԱՄՆ դոլար: ԵԱԶԲ պորտֆելում հիմնական մասնաբաժինը զբաղեցնում են ինտեգրացիոն էֆեկտով նախագծերը տրանսպորտային ենթակառուցվածքների, թվային համակարգերի, կանաչ էներգիայի, գյուղատնտեսության, արդյունաբերության և մեքենաշինության ոլորտներում: Բանկն իր գործունեության ընթացքում առաջնորդվում է ՄԱԿ-ի Կայուն զարգացման նպատակներով և ESG սկզբունքներով:
