Հայաստանը կարող է կամուրջ դառնալ Իրանի, Հնդկաստանի և ԵԱՏՄ երկրների միջև․ ՀՀ ԱԳ փոխնախարար

ԵՐԵՎԱՆ, 5 դեկտեմբերի․/ԱՌԿԱ/․ Հայաստանը՝ որպես ԵԱՏՄ անդամ, կարող է կամուրջ դառնալ Իրանի, Հնդկաստանի և միության պետությունների միջև, ասաց Հայաստանի արտաքին գործերի փոխնախարար Մնացական Սաֆարյանը «Խաղաղության խաչմերուկ» համաժողովի ժամանակ։

«Քանի որ Իրանը ԵԱՏՄ-ի հետ ունի ազատ առևտրի գոտու մասին համաձայնագիր, իսկ Հնդկաստանը նույն հարցի շուրջ բանակցություններ է վարում, Հայաստանը՝ որպես ԵԱՏՄ անդամ, կարող է կամուրջ դառնալ Իրանի, Հնդկաստանի և միության երկրների միջև»,- ասաց նա։

Սաֆարյանն ընդգծեց, որ ՀՀ կառավարությունը կարևորում է գործընկերության զարգացումը տարածաշրջանային և գլոբալ նախաձեռնություններում, ինչպիսիք են «Հյուսիս-Հարավ» միջազգային տրանսպորտային միջանցքը, «Պարսից ծոց-Սև ծով» միջազգային տրանսպորտային և տարանցիկ միջանցքը և Չաբահար նավահանգստի զարգացման ծրագիրը, որը նախաձեռնել են Հնդկաստանն ու Իրանը։

 «Վստահ ենք, որ Հայաստանի ճանապարհային ցանցը մեծ ներուժ ունի այս նախաձեռնություններին նպաստելու համար:ՀՀ կառավարությունը, «Հյուսիս-Հարավ» տրանսպորտային միջանցքի ներդրումային ծրագրի իրականացման միջոցով, ջանքեր է գործադրում երկրի համապատասխան ենթակառուցվածքների վերաշահագործման և արդիականացման ուղղությամբ»,- ասաց նա։

Նրա խոսքով, այս ծրագրի միջոցով Հայաստանը ոչ միայն կընդլայնի իր հնարավորությունները, այլև հնարավորություն կունենա լիարժեք մասնակցել «Հյուսիս-Հարավ» միջանցքին և այլ նախաձեռնություններին։

«Հայաստանով անցնող «Հյուսիս-Հարավ» միջազգային տրանսպորտային միջանցքի հատվածի զարգացումը և «Պարսից ծոց-Սև ծով» միջանցքի գործարկումը ներուժ ունեն ոչ միայն մասնակից երկրների միջև տնտեսական ակտիվությունը բարձրացնելու համար, այլև այն մեծ ազդեցություն կունենան. տրանսպորտային գծերի և համապատասխան ենթակառուցվածքների զարգացման վրա պետությունների տարածքներում»,- ասաց նա։

Սաֆարյանը նշեց, որ մասնակից պետությունները կարող են ստեղծել համատեղ արդյունաբերական, գյուղատնտեսական, լոգիստիկ կլաստերներ և այլ անհրաժեշտ օբյեկտներ՝ դեպի Եվրոպա արտահանումը պարզեցնելու համար։

«Պարսից ծոց–Սև ծով» միջազգային տրանսպորտային միջանցքի մասին

«Պարսից ծոց-Սև ծով» մուլտիմոդալ միջանցքի նախագծին Հայաստանի մասնակցությունը, բացի «Հյուսիս-Հարավ» տրանսպորտային միջանցքից, թույլ կտա հանրապետությանը դիվերսիֆիկացնել բեռնափոխադրման ուղիները, օգտագործել Իրանի նավահանգիստները և դառնալ կարևոր տարանցիկ հանգույց։ Իրանի կողմից նախաձեռնված և առաջ մղվող այս միջազգային նախաձեռնության մասնակիցներն են նաև Վրաստանը, Բուլղարիան և Հունաստանը: Նախագծին մասնակցելու հետաքրքրություն է ցուցաբերում նաև Հնդկաստանը։

«Հյուսիս–Հարավ» միջազգային տրանսպորտային միջանցքի մասին

«Հյուսիս-Հարավ» միջազգային տրանսպորտային միջանցքը ուղևորների և բեռների փոխադրման մուլտիմոդալ երթուղու նախագիծ է, Սանկտ Պետերբուրգից մինչև Մումբայ նավահանգիստ ընդհանուր երկարությունը 7,2 հազար կմ է։ Նախագծի ավարտից հետո երթուղող կիրականացվի բեռների տարանցում Հնդկաստանից, Իրանից և Պարսից ծոցի այլ երկրներից դեպի Ռուսաստանի տարածք (Կասպից ծովով) և այնուհետև Հյուսիսային և Արևմտյան Եվրոպա: Միջանցքի հաշվարկային թողունակությունը տարեկան 30 մլն տոննա բեռ է։-0-