ՀՀ նախագահ. Հայաստանը պատրաստ է ամենայն աջակցություն ցուցաբերել եղբայր Ֆրանսիային

ԵՐԵՎԱՆ, 14 նոյեմբերի. /ԱՌԿԱ/. Հայաստանը պատրաստ է ամենայն աջակցություն ցուցաբերել եղբայր Ֆրանսիային, հայտարարել է ՀՀ նախագահ Սերժ Սարգսյանը Փարիզում գրանցված ահաբեկչությունների կապակցությամբ նախագահ Ֆրանսուա Օլանդին ուղղված ցավակցական հեռագրում։

Նախօրեին ուշ երեկոյան Փարիզում մի շարք ահաբեկչական գրոհներ են գրանցվել, այդ թվում` «Բաստիլ» համերգասրահում, Հանրապետության հրապարակի մոտակայքում, Բաստիլի հրապարակում։ Նախնական տվյալներով` զոհվածների թիվը հասել է 153–ի, ավելի քան 200 մարդ վիրավոր է։

«Խորապես ցնցված եմ այս գիշեր Փարիզում տեղի ունեցած՝ իր մասշտաբներով աննախադեպ ահաբեկչությունների լուրից: Խստագույնս դատապարտում եմ այդ զարհուրելի գործողությունները, որոնք բազմաթիվ անմեղ կյանքեր խլեցին», – նշել է Սարգսյանը։

Նրա խոսքով` վերջին տարիներին աշխարհի տարբեր երկրներում այսօրինակ անմարդկային բնույթի բռնությունների աճը լուրջ մտահոգության տեղիք է տալիս

ՀՀ նախագահը վստահություն է հայտնել, որ քաղաքակիրթ հանրության յուրաքանչյուր անդամ կմիանա պատուհասած այս չարիքի դեմ պայքարին: «Մենք չենք կարող թույլ տալ, որ բռնությունը, ծայրահեղականությունը և անհանդուրժողականությունը գերիշխեն: Մենք պարտավոր ենք համատեղ ջանքերով բացահայտել և արմատախիլ անել այն բոլոր գործոնները, որոնք ծայրահեղականության նման սարսափազդու դրսևորումների պատճառ են դառնում», – ընդգծել է Սարգսյանը։

ՀՀ նախագահը խորին ցավակցություն է հայտնել Ֆրանսիայի բարեկամ ժողովրդին և զոհվածների հարազատներին՝ մաղթելով համբերություն, ուժ ու կորով, իսկ վիրավորներին՝ շուտափույթ ապաքինում: «Ֆրանսիացի ժողովրդի հետ են մեր աղոթքները, սրտերն ու հոգիները»,- ասված է ՀՀ նախագահի ցավակցական հեռագրում:

Նախնական տվյալներով` Փարիզում գրանցված ահաբեկչությունների հետևանքով զոհերի և տուժածների թվում Հայաստանի քաղաքացիներ չկան։–0–