ԱՄՆ–ից Հայաստան ուղարկված բաճկոնից հայտնաբերվել է մոտ 1400 գրամ «մեթամֆետամին» տեսակի թմրանյութ

ԵՐԵՎԱՆ, 20 նոյեմբերի․/ԱՌԿԱ/․ ՀՀ ՊԵԿ Երևանի մաքսային սպասարկման կենտրոն-մաքսատուն, վարչության և մաքսանենգության դեմ պայքարի վարչության աշխատակիցները համատեղ հայտնաբերել են թմրամիջոցի անօրինական տեղափոխման հերթական դեպքը, հաղորդում է ՊԵԿ տեղեկատվության և հասարակայնության հետ կապերի բաժինը:

ԱՄՆ-ից ՀՀ փոստային առաքանու միջոցով՝ ֆիզիկական անձի անունով, ներմուծվել է բաճկոն։ Բաճկոնը ենթարկվել է ռենտգեն զննման, որի ներսում մաքսային ծառայողի կողմից կասկածելի իր է նկատվել:

Տվյալ առաքանին պահվել է, և ծանուցագիր է ուղարկվել ստացող ֆիզիկական անձին, որպեսզի ներկայանա «Ապավեն Կարմիր բլուր» մաքսային հսկողության տարածք՝ իր ներկայությամբ զննություն իրականացնելու նպատկաով։ Նշված ապրանքի ստացողը չի ներկայացել, և ապրանքը պահվել է մաքսային մարմիններում։ Ժամանակավոր պահպանման ժամկետը լրանալուց հետո` օրեսդրությամբ սահմանված կարգով, ապրանքը ենթակա է եղել արգելապահման, ինչի պատճառով մաքսային ծառայողի կողմից կրկին զննվել է վերը նշված բաճկոնը, որի ընթացքում բացվել են բաճկոնի կարերը:

Հայտնաբերվել է 1388 գրամ քաշով թմրանյութին նմանվող սպիտակ զանգված։ Մաքսանենգության դեմ պայքարի վարչությունում առկա տեխնիկական միջոցների զննման արդյունքում պարզվել է, որ այդ սպիտակ զանգվածը հանդիսանում է «մեթամֆետամին» տեսակի թմրանյութ։

Մաքսնանեգության դեպքի վերաբերյալ կազմվել է համապատասխան արձանագրություն` ՀՀ «Քրեական օրենսգրքի» 399-րդ հոդվածի հատկանիշներով: Նյութերն ուղարկվել են ՀՀ քննչական կոմիտե:-0-

Ծանոթացեք լուրերին առաջինն ու քննարկեք դրանք մեր Telegram-ում

15:30 20.11.2023