Երևանում զինված խմբի մոտ այլևս պատանդներ չկան
ԵՐԵՎԱՆ, 31 հուլիսի. /ԱՌԿԱ/. Երևանում ՊՊԾ գնդի շենքը գրաված զինված խմբավորման մոտ այլևս պատանդներ չկան. այնտեղ մնացած երկու բուժաշխատողները (բժիշկը և բուժքույրը) լքել են տարածքը:
Ինչպես հայտնել է 1am.am-ին խմբավորման առաջատարներից մեկը՝ Վարուժան Ավետիսյանը, նրանք պատանդի կարգավիճակում չեն պահել բժիշկներին, նրանց նկատմամբ հսկողություն չի եղել և թույլատրել են ցանկացած պահին հեռանալ:
«Երեկ մեր ժամապահը նկատեց, որ վերջում մնացած երկու բժիշկներն էլ իրենց կամքով հեռացան: Մենք ասել էինք՝ ձեր խղճին կմնաք, թե որ որոշեցին գնան. Աստված իրենց հետ: Նրանք այստեղ հատուկ հսկողության տակ չեն եղել»,- նշել է Ավետիսյանը:
Զինված խմբավորումը պատանդ էր վերցրել չորս բուժաշխատողից բաղկացած շտապօգնության բրիգադին հուլիսի 27-ին: Երկու նբուժաշխատող՝ բժիշկը և բուժակը, ավել վաղ էին լքել գնդի տարածքը:
ՊՊԾ գնդի շենքը զավթած անձինք պահանջում են ազատ արձակել Ժիրայր Սեֆիլյանին, ով կալանավորվել է շուրջ մեկ ամիս առաջ մի խումբ անձանց կողմից զենք ապօրինի պահելու կասկածանքով։ -0-