Երեք մարդ է մահացել Ճամբարակում պայթյունի հետևանքով

ԵՐԵՎԱՆ, 11 հունիսի․/ԱՌԿԱ/․ Ճամբարակում առավոտյան տեղի ունեցած պայթյունի հետևանքով, ընդհանուր առմամբ, հոսպիտալացվել է 11 տուժած, երեք մարդ մահացել է։

Այժմ կազմակերպվում է նրանցից 3-ի տեղափոխումը երևանյան բուժհաստատություններ, հայտնում է Առողջապահության նախարարության մամուլի ծառայությունը։

«Տուժածների առողջական վիճակը գնահատվում է միջին ծանրության և բավարար, բոլորը ստանում են համապատասխան բուժօգնություն»,- հայտնում են գերատեսչությունից։

Ինչպես հայտնում է ՀՀ Փրկարար ծառայությունը, հունիսի 11-ին, ժամը 08։34-ին ահազանգ է ստացվել, որ Ճամբարակի շենքերից մեկի բնակարաններից մեկում հրդեհ է բռնկվել։ Ըստ նախնական տվյալների Ճամբարակի  շենքերից մեկում տեղի է ունեցել գազի պայթյուն՝ փլուզումով․ շենքի երրորդ հարկի բնակարաններից մեկում․ փլուզվել են 4-րդ, 3-րդ և 2-րդ հարկի բնակարանները։