Հայրիկյանի վրա կրակել են ձերբակալվածներից մեկի մոտ հայտնաբերված նագանից. ԱԱԾ
ԵՐԵՎԱՆ, 11 փետրվարի. /ԱՌԿԱ/. ՀՀ նախագահի թեկնածու, «Ազգային ինքնորոշում միավորում» կուսակցության առաջնորդ Պարույր Հայրիկյանի վրա կրակել են «Նագան» տեսակի ատրճանակից, որը հայտնաբերվել է այդ գործով ձերբակալվածներից մեկի մոտ, հաղորդեցին ԱԱԾ մամուլի կենտրոնից` հղում անելով փորձաքննության արդյունքներին։
Հունվարի 31–ին Հայաստանի նախագահի թեկնածու, «Ազգային ինքնորոշում» միավորում» կուսակցության առաջնորդ Պարույր Հայրիկյանը հրազենային վերք է ստացել ուսի շրջանում, ինչից հետո հաջող վիրահատություն է տարել։
Ուրբաթ Ազգային անվտանգության ծառայության մամուլի կենտրոնը տեղեկացրեց, որ Հայրիկյանի դեմ մահափորձ կատարելու կասկածանքով բերման են ենթարկվել Խաչատուր Պողոսյանն ու Սամվել Հարությունյանը։ Իսկ մեկ օրից հաղորդագրություն է ստացվել կալանավորվածներից մեկի բնակարանում «Նագան» տեսակի ատրճանակի հայտնաբերման մասին։ Նման տեսակի զենքից, ըստ մասնագետների, կրակոցներ են իրականացվել դեպքի վայրում։
ԱԱԾ մամուլի կենտրոնի հաղորդագրության համաձայն` ատրճանակը հայտաբերվել է կասկածյալ Խաչատուր Պողոսյանի կնոջ հայտնած տեղեկությունների հիման վրա:
«Առգրավված զենքն ուղարկվել էր դատաձգաբանական փորձաքննության: Քրեական վարույթն իրականացնող մարմինն արդեն ստացվել է փորձագետի եզրակացությունը, որով պարզ է դարձել, որ դեպքի վայրի զննությամբ և տուժող Պարույր Հայրիկյանի վիրահատությամբ մարմնից հայտնաբերված 2 հատ 7,62 մմ տրամաչափի գնդակներն արձակվել են դատաձգաբանական փորձաքննության ուղարկված «Նագան» տեսակի թմբուկավոր ատրճանակից»,– ասվում է հաղորդագրության մեջ։
Ինչ վերաբերում է իրականացվող նախաքննության ոչ լիարժեքության վերաբերյալ շրջանառվող լուրերին, ԱԱԾ մամուլի կենտրոնից մեկնաբանեցին, որ քննության առաջին իսկ օրից կիրառվել և կիրառվում են օրենքով նախատեսված մատչելի և անհրաժեշտ բոլոր միջոցները դեպքի յուրաքանչյուր հանգամանք անվերապահ հաստատելու համար:
«Հավաստիացնում ենք, որ պատշաճ իրավական ընթացակարգի շրջանակներում կստուգվի ցանկացած ողջամիտ կասկած կամ կքննարկվի ամեն մի պահանջ, որը կբխի գործի համակողմանի և օբյեկտիվ քննության շահերից»,- ասվում է հաղորդագրությունում։ –0–
