Տուլայի ՃՏՊ–ից տուժածների կյանքին վտանգ չի սպառնում. Մուրադյան
ԵՐԵՎԱՆ, 6 նոյեմբերի. /ԱՌԿԱ/. Տուլայի ՃՏՊ–ի` Երևան ժամանած տուժածների կյանքին վտանգ չի սպառնում, լրագրողներին ասել է Հայաստանի առողջապահության նախարար Արմեն Մուրադյանը։
Նախօրեի ուշ երեկոյան Երևան է ժամանել Ռուսաստանի ԱԻՆ հատուկ չվերթը Տուլայի ՃՏՊ–ի հետևանքով տուժած 32 քաղաքացիներով, ևս 12 մարդ մնացել է Ռուսաստանում բուժումը շարունակելու համար, նրանք ռուս բժիշկների հսկողության ներքո են։
«Խոսքը գանգուղեղային վնասվածքների, ողնաշարի, ողերի և ազդրոսկրերի կոտրվածքների, բաց վերքերի մասին է։ Նրանց կյանքին այս պահին վտանգ չի սպառնում։ Թռիչքն անցել է առանց միջադեպերի»,– ասել է Մուրադյանը։
Ինչպես հայտնում է «Նովոստի–Արմենիա» գործակալությունը, նրա խոսքով, առավել ծանր վիճակում գտնվող ութ տուժածներ տեղափոխվել են «Սուրբ Գրիգոր Լուսավորիչ» բժշկական կենտրոն, իսկ մյուսներն ուղղվել են այլ կլինիկաներ։
«Հիվանդների բուժումը Ռուսաստանում իրականացվել է Ռուսաստանի առողջապահության նախարարության հաշվին, Հայաստանում` մեր երկրի առողջապահության նախարարության հաշվին»,– պարզաբանել է նա։
Նախարարը հայտնել է նաև, որ 12 տուժածներ նախօրեին ուղղաթիռներով տեղափոխվել են Տուլայի կլինիկական հիվանդանոց։
«Նրանցից երկուսը ծայրահեղ ծանր վիճակում են։ Մեկին վիրահատել են այսօր: Բոլոր հիվանդները բժիշկների խիստ վերահսկողության ներքո են»,– ասել է Մուրադյանը, ընդգծելով, որ բժիշկներն աննպատակահարմար են համարել նրանց տեղափոխումը Հայաստան։
«Ռուսաստանի առողջապահության փոխնախարարը շարունակում է նրանց կողքին մնալ։ Հայկական կողմը տեղեկություն է ստանում յուրաքանչյուր երեք ժամը մեկ»,– ավելացրել է նա։
Խոսելով վարորդների վիճակի մասին` Մուրադյանն ասել է, որ ֆիզիկական վնասվածքներ չունեն, իսկ հոգեբանական օգնությունը նրանց կցուցաբերվի անհրաժեշտության դեպքում։
«Հայգեր» մակնիշի ուղևորատար ավտոբուսը Տուլայի մարզի Ուզլովայա շրջանում կողաշրջվել է «Դոն» ավտոճանապարհին նոյեմբերի 3–ի լույս գիշերը։ «Կինգ Դելյուքս» ՍՊԸ-ին պատկանող ավտոբուսում եղել է 63 մարդ:
Վթարի հետևանքով զոհվել է 8 մարդ, իսկ 35 մարդու առողջությանն անզգուշությամբ պատճառվել են տարբեր աստիճանի մարմնական վնասվածքներ: Ավտոբուսի վարորդը 2 ամսով կալանավորվել է: -0-
Ծանոթացեք լուրերին առաջինն ու քննարկեք դրանք մեր Telegram-ում
12:48 06.11.2015
