Երևանի «Սպայկա» ընկերության շենքում բռնկված հրդեհի մարման ժամանակ երկու հրշեջ է տուժել

ԵՐԵՎԱՆ, 16 մայիսի. /ԱՌԿԱ/.  Երևանում «Սպայկա» ընկերության շենքում բռնկված հրդեհի մարման ժամանակ ԱԻՆ երկու աշխատակիցներ են տուժել, «Նովոստի–Արմենիա» գործակալությանը հայտնեց Հայաստանի ԱԻՆ Փրկարար ծառայության պետի տեղակալ Նիկոլայ Գրիգորյանը։

«Նրանցից մեկը ոտքի վնասվածք է ստացել, մյուսը` ծուխ է շնչել։ Երկուսի վիճակն էլ գնահատվում է բավարար»,– ասաց Գրիգորյանը։

Նա միաժամանակ նկատեց, որ դեռ պարզ չէ, թե հրդեհը երբ կմարվի, քանի որ շենքում բազմաթիվ հրդեհավտանգ դյուրավառ նյութեր կան։ Գրիգորյանի հետ զրույցի պահին կրակը նոր ուժով է բռնկվել։ Սակայն Փրկարար ծառայության պետի տեղակալի խոսքով` կրակը տեղայնացվել է, և հետագա տարածման վտանգ չկա։

Հաղորդագրության համաձայն, հրդեհը բռնկվել է նախօրեի երեկոյան։ Ընդհանուր առմամբ, հրշեջ աշխատանքներում ներգրավված է 17 մարտական հաշվարկ, երեք ավտոսանդուղք, գազածխապաշտպան օղակ, երկու փրկարարական ջոկատ, հատուկ նշանակության փրկարար աշխատանքների իրականացման կենտրոնի 110 հրշեջներ և փրկարարներ, արտակարգ իրավիճակների արձագանքման խումբ։

Հայտարարվել է հրդեհի բարդության «2-րդ», այնուհետև «3-րդ»  աստիճան:

Դեպքի մասին տեղյակ են պահվել «1-02», «1-03», էլ. ցանցի և ՃՈ-ի հերթապահները։

«Սպայկա» ընկերությունը հիմնադրվել է 2001 թվականին: «Սպայկան» Հայաստանի բեռնափոխադրող ընկերություններից մեկն է, որն իրականացնում է միջազգային ավտոբեռնափոխադրումներ Եվրոպա և ԱՊՀ երկրներ։ Ընկերությունն իր սեփական շարժակազմի ավտոմեքենաներով իրականացնում է բեռների տեղափոխում (արագ փչացող ապրանքից մինչև հատուկ նշանակության ոչ ստանդարտ բեռներ) «դռնից դուռ» սկզբունքով:-0-